La conseyera de Cultura, Política Llingüística y Deporte, Vanessa Gutiérrez, asistió ayeri a la recuperación de nuevos restos fósiles d’un gran dinosauriu saurópodu nos cantiles de Ribeseya. Esta intervención forma parte de la segunda campaña d’escavación que lleva a cabu l’equipu científicu del Muséu del Xurásicu d’Asturies (MUXA), en collaboración colos investigadores Pablo Puerta, del Muséu de Trelew (Arxentina), y Oliver Rauhut, paleontólogu especializáu en dinosaurios.
Nesta ocasión treslladóse un bloque de gran tamañu cola escápula. Por cuenta de la dificultá d’accesu al yacimientu, el pesu de los bloques y el valor escepcional del material recuperáu, foi necesariu usar l’helicópteru del Serviciu d’Emerxencies del Principáu (SEPA) pa treslladalos dende’l cantil hasta la sablera de Vega. Dende ellí, el Conceyu de Colunga va encargase del so tresporte hasta’l MUXA. Amás, nes fases previes de la escavación, la Guardia Civil collaboró nel treslláu de ferramientes y materiales al llugar.
L’equipu científicu del MUXA, formáu por José Carlos García-Ramos y Laura Piñuela, trabaya xunto con Puerta y Rauhut nesta segunda campaña, que da continuidá a la realizada en xunetu. Naquella primer fase yá se recuperaron delles vértebres caudales, un pubis, un isquion, una costiella completa, cuatro chevrones y un bloque con vértebres de la cola.
Los trabayos nesti yacimientu van siguir el próximu añu. Valórase que van ser necesaries a lo menos dos o trés campañes más pa estrayer tolos restos fósiles d’esti dinosauriu saurópodu, un animal cuadrúpedu, herbívoru, de pescuezu y cola llargos, que’l so tamañu calcúlase nunos 20 metros de llargor, mayor de lo previsto primeramente.
