La Real Academia de Ciencies Morales y Polítiques (RACMYP) ye una de les diez Reales Academies del Institutu d’España, ocupando’l quintu puestu pola so fecha de creación pola Reina Isabel II en 1857. Definíse a sí mesma como un espaciu d’alcuentru y alderique de los saberes sociales, económicos, filosóficos y político- xurídicos. Ta compuesta por 44 miembros de númberu, que detentan de forma vitalicia les sos correspondientes medayes.
Francisco J. Llera Ramo, asturianu de Caravia, ye Caderalgu Eméritu de Ciencia Política de la Universidá del País Vascu. Esti nomamientu reconoz mediu sieglu de dedicación a la docencia y la investigación nes universidaes de Deusto, Pablo de Olavide y, sobre manera, del País Vascu, amás de ser Visiting Fellow na Yale University, onde collaboró col gran Juan J. Linz, y detentó la Cátedra Príncipe d’Asturies na Georgetown University. Y, tamién y perespecialmente, el so compromisu na defensa de los valores democráticos y la calidá de la nuesa democracia, lo que lu llevó a ser un referente nel estudiu (dende’l Euskobarómetro, fundáu y empobináu por él) y la llucha contra’l terrorismu nel País Vascu y na defensa de les víctimes. Por ello ta en posesión de la Encomienda de Númberu de la Orde del Méritu Civil y de la Insinia de la Real Orde de Reconocencia Civil a les Víctimes del Terrorismu. Participó na Comisión que diseñó’l Centru Memorial de les Víctimes del Terrorismu de Vitoria y ye miembru de la Comisión Executiva y del Patronatu de la Fundación de Víctimes del Terrorismu. Tamién foi Viceconseyeru y Director del Institutu Vascu d’Estadística del Gobiernu Vascu.
Con esta elección, a la qu’aspiraben otros dos candidatos (José Mª Peiró de la Univ. de Valencia y Salvador Rus de la Univ. de Llión), Francisco J. Llera Ramo sigue la llista d’asturianos pernomaos miembros d’esta Real Academia (Pedro José Pidal, el so primer Presidente, Adolfo Álvarez-Buylla, Melquiades Álvarez, Constantino Fernández Vallín, José Mª Fernández Ladreda, Julián García San Miguel, Adolfo González Posada, Valentín d’Andrés, Juan Velarde, Alberto Aza, Sabín Fernández Riolo y el so actual Presidente Benigno Pendás). Perteneciente a la diáspora asturiana, la cultura, la llingua y la identidá asturianes tuvieron bien presentes nes sos esmoliciones académiques y nel so compromisu social, como bon paisanu y almirador d’Aurelio de Llano y la so obra. Ye miembru de númberu de l’Academia de la Llingua Asturiana.
