El conceyal d’Izquierda Xunida, Alejandro Farpón, denunció la esistencia d’una instrucción directa per parte del conceyal de Tráficu, el forista Pelayo Barcia, pa que la rotulación gráfica d’EMTUSA se realice esclusivamente en castellanu. Esta midida afectaría a los nuevos autobuses que la empresa municipal incorpore a la so flota.
Farpón señala que se trata d’una “midida arbitraria, ensin rigor, contraria al trabayu coordináu que realiza la Oficina de Normalización Llingüística con otros departamentos municipales pa la promoción y usu del asturianu. Nesti casu, EMTUSA lleva años usando una rotulación billingüe ensin que supunxera problema dalgunu pa la ciudadanía, nin fuera motivu de debate o quexes”. Insiste’l conceyal en que “el sellu de la conceyalía de Barcia ye xenerar problemes onde nun los hai, pudiendo afirmar que cada midida adoptada pola conceyalía de Tráficu nesti mandatu supón un retrocesu pa Xixón”.
Dende Izquierda Xunida anuncien que presentarán una iniciativa pa que la rotulación gráfica de la empresa pública de tresporte urbanu vuelva al formatu billingüe, en castellanu y asturianu. Alejandro Farpón entrúgase “si VOX sumó un nuevu conceyal nel Gobiernu llocal”, recordando “los votos discrepantes de Barcia cola so formación énte’l debate sobre la prohibición del burka n’espacios municipales, el negacionismu climáticu pa nun desenvolver la zona de baxes emisiones o derogar la ordenanza de Movilidá Sostenible, a lo que se suma agora enarbolando la bandera contra l’usu del asturianu”.
