El Principáu punxo en marcha la nueva Oficina Xudicial de Xixón, un órganu que surde de la entrada en vigor de l’aplicación de la Llei Orgánica 1/2025, de Midíes d’Eficiencia del Serviciu Públicu de Xusticia. La Conseyería d’Facienda, Xusticia y Asuntos Europeos monitorizó la evolución de la xornada pa atender posibles desaxustes técnicos o informáticos, con personal específicu desplazáu al Palaciu de Xusticia de Xixón. Esta ye la segunda oficina que s’activa dientro de los trés grandes partíos xudiciales del Principáu, tres la d’Avilés. En breve entamará tamién a funcionar la d’Uviéu.
El desarrollu de la norma estatal supunxo la creación de 25 nueves places y la meyora de les retribuciones d’otros 80 puestos que van ser les xefatures d’equipos, lo que supón una inversión de 1,3 millones.
La oficina de Xixón asumirá dende agora los casos de violencia sobre la muyer que se produzan nos partíos xudiciales de Siero, Villaviciosa, Cangues d’Onís, Llanes y Piloña. Pa ufiertar un meyor serviciu a les víctimes, Xusticia creó una segunda plaza de xuez especializáu y punxo en marcha delles midíes organizatives. Por exemplu, les muyeres que tengan que desplazase a Xixón van disponer d’un serviciu de tresporte gratuitu a demanda, cubiertu pol gobiernu.
Previamente, la Viceconseyería habilitó tecnolóxicamente tolos xulgaos de paz hai meses, con una inversión de 400.000 euros, pa garantizar que les actuaciones se puedan realizar telemáticamente dende los territorios d’orixe de les víctimes. En tolos casos, si’l procedimientu o l’autoridá xudicial requirieren el treslláu a Xixón, esti va tar siempres cubiertu pol Gobiernu d’Asturies.
