La tensión social y el clima d’acosu na zona llevaron a l’Asociación de Vecinos «Alfonso Camín» a señalar directamente al equipu de gobiernu del Conceyu de Xixón y a la so alcaldesa, Carmen Moriyón, como responsables del deterioru de la convivencia pola so «política d’inaición y demora» a la hora d’atender los problemes del barriu de La Calzada.
Al traviés d’un duru comunicáu, la entidá vecinal denunció una «espiral d’hostigamientu ya intimidación» que carecen los residentes. Ente los episodios más graves, destaquen los insultos y amenaces sufríos por un miembru de la so xunta directiva —un home de más d’ochenta años y hestóricu del barriu— tres una concentración na cai Guatemala, amás d’agresiones físiques y del acosu sistemáticu en redes y na cai contra la entidá social Mar de Niebla y la propia asociación.
Dende la xunta directiva señalen que la falta de decisiones firmes y el silenciu enllargáu del Consistoriu respectu a proyectos sensibles —como los rumores sobre’l treslláu d’usuarios del Albergue a La Casa del Mar, que Moriyón desmintió recién en redes sociales— sirvieron de «caldu de cultivu» pa que determinaos sectores alimenten bulos, aviven l’aporofobia y frañan la paz social.
Énte esta situación, l’AV «Alfonso Camín» esixe a l’Alcaldía y a la conceyalía competente una xunta presencial ya inmediata pa conocer les midíes concretes de seguridá que se van adoptar. Coles mesmes, reafirmen el so compromisu con defendel barriu, la llibertá d’espresión y la convivencia frente a cualesquier campaña d’amedentramientu.
