Los últimos datos disponibles del INE, del 2024, apunten que casi’l 18% de la población española nun pue caltener la so vivienda a una temperatura afayadiza, lo que reflexa la magnitú d’un problema de probeza enerxética, que, nun contestu de volatilidá nos mercaos enerxéticos, podría agravase nel futuru. El bonu social llétricu, un descuentu na factura de la lluz dirixíu a consumidores vulnerables, contribúi a amenorgar la probeza enerxética n’España, pero nun lo fai de forma equitativa. Esta ye la principal conclusión d’una investigación recién, realizada por Manuel Llorca, de la Copenhagen Business School, y Ana Rodríguez-Álvarez, de la Universidá d’Uviéu, qu’analiza l’impactu d’esta ayuda nos llares españoles. L’estudiu publicóse na revista Energy Economics, de gran impactu na so área de conocencia.
El trabayu básase en datos de llares españoles ente 2021 y 2023 y aplica un enfoque innovador que dexa comparar el nivel real de probeza enerxética de los llares col so mínimu potencial, según les sos característiques y renta. Los resultaos amuesen que’l bonu social nun llega a tolos que lu precisen. Los investigadores atoparon, amás, que, del análisis de los llares en situación de probeza enerxética, aquellos con menores ingresos —precisamente los más vulnerables— apuerten en menor midida a l’ayuda al respective de los que nun tán nuna situación tan estrema. “Esti resultáu podría tar rellacionáu cola falta d’información, asina como cola complexidá de los trámites necesarios pa solicitala, lo qu’enzanca’l so accesu a los que más la necesiten”, comenta Ana Rodríguez Álvarez, catedrática d’Economía de la Universidá d’Uviéu.
“De fechu, ente los llares vulnerables, son aquellos con mayor nivel educativu o con accesu a ferramientes como un ordenador, los que presenten niveles relativamente menores de probeza enerxética, probablemente porque apuerten meyor a la información y a les ayudes disponibles”, añede esta investigadora.
Los que más lu precisen, los que menos ameyoren
Amás, inclusive cuando estos llares apuerten al bonu, los resultaos amuesen una segunda llimitación relevante: los llares más probes son aquellos pa los que l’efectu estimáu del bonu resulta más llimitáu. Esto ye, el bonu social eléctricu tien un efectu positivu, pero’l so impactu nun se distribúi de manera uniforme ente los distintos grupos de población. Son los llares más probes ente los probes los que consiguen un menor efectu d’esta ayuda. “El nuestru trabayu suxere que dellos llares vulnerables podríen enfrentase a llimitaciones estructurales qu’enzanquen que l’ayuda se traduza en meyores significatives de la so situación enerxética”, indica Manuel Llorca, investigador de la Copenhagen Business School.
“En resume, el nuestru estudiu indica que non solo hai un problema d’accesu al bonu social, sinón tamién de la capacidá real de los llares más vulnerables p’ameyorar la so situación enerxética entá cola ayuda del bonu social”, añede esti investigador.
Per otru llau, la investigación confirma que la probeza enerxética agravóse mientres los años recientes de crisis enerxética, impulsada pol aumentu de los precios de la enerxía tres del andanciu y el contestu internacional. Nesti sentíu, l’actual contestu d’incertidume xeopolítica y volatilidá nos mercaos enerxéticos podría volver intensificar el problema nos próximos meses.
Retos y propuestes de meyora
Énte esta situación, l’estudiu plantega delles llinies d’actuación p’ameyorar la eficacia del bonu social llétricu. Ente elles, destaquen la necesidá d’ameyorar los mecanismos d’identificación de los llares vulnerables, por casu, per aciu l’usu de datos fiscales o de prestaciones sociales que dexen automatizar l’accesu a l’ayuda. Coles mesmes, sorráyase la importancia de simplificar los procedimientos alministrativos y amenorgar les barreres burocrátiques, col fin de facilitar l’accesu a los llares con mayores dificultaes. Amás, los autores destaquen la necesidá de complementar el bonu social con midíes estructurales, como la meyora de la eficiencia enerxética de les viviendes, que dexen amenorgar el problema al llargu plazu. A lo último, l’estudiu apunta a la conveniencia de revisar dacuando’l diseñu de l’ayuda p’adaptala a la evolución de los precios de la enerxía y a posibles cambeos nel contestu económicu.
“Los nuestros resultaos ponen de manifiestu que, anque’l bonu social eléctricu constitúi una ferramienta útil, presenta importantes llimitaciones en términos de cobertoria y eficacia. Asina, ameyorar l’accesu a l’ayuda y adaptala a les necesidaes de los llares más vulnerables va ser clave p’aumentar el so impactu”, coinciden dambos investigadores.
