El Gobiernu d’Asturies aprobó güei’l proyectu de Llei de Salú Mental, una norma que busca fortalecer derechos, fomentar la prevención y combatir l’estigma, y qu’asitia Asturies a la vanguardia nacional en participación y atención comunitaria.
“Esta llei ye la espresión d’un compromisu colectivu. Ye la respuesta a un mandatu social nidiu: curiar más y curiar meyor. Ye una llei que protexe, qu’acompaña y que reconoz la dignidá de toles persones”, valoró la conseyera de Salú, Concepción Saavedra.
El testu lexislativu ye’l resultáu d’un trabayu qu’empezó al entamu de la llexislatura, cuando la salú mental asitióse nel focu de les polítiques públiques y abrióse’l camín p’algamar un gran consensu social nesta materia. L’alcuerdu materializó’l branu pasáu per aciu la robla, con más un centenar d’entidaes públiques y privaes, del Pactu pola Salú Mental, el documentu que constitúi la base ética y política de la nueva norma. Escuchar, entender y construyir dende la realidá de les persones que carecen sufrimientu psicosocial fueron les claves del procesu.
Asturies foi pionera na reforma psiquiátrica de los años 80 del sieglu pasáu, cuando apostó pola desinstitucionalización de pacientes y el desenvolvimientu d’un modelu d’asistencia comunitaria, un enfoque nel qu’agora s’afonda. El proyectu reconoz a les persones con problemes de salú mental capacidá pa decidir sobre la so vida y los sos tratamientos, de la qu’incorpora derechos específicos, como la voluntariedá de l’atención, el plan terapéuticu individualizáu, la perspectiva de xéneru y l’especial protección de la infancia y l’adolescencia.
La nueva llei refuerza la promoción y la prevención ya incorpora midíes nel ámbitu educativu, llaboral y local, asina como una estratexa específica frente a la conducta suicida. Amás, consolida la rede de salú mental como sistema organizáu, comunitariu y coordináu con atención primaria pa favorecer la recuperación de les persones y la continuidá de los curiaos.
Una de les grandes novedaes que plantega la norma ye la creación d’una Oficina pa la Protección de los Derechos en Salú Mental, que se va encargar de comprobar si se respeten los derechos de les persones usuaries de los servicios y recursos de salú mental. Tamién recueye la constitución de nuevos preseos de participación y garantía: el Foru de Salú Mental y la Comisión de Salú Mental.
A lo llargo del mandatu fueron dándose pasos, de la mano d’asociaciones, entidaes, sociedaes científiques y el tercer sector p’ameyorar el bienestar emocional de la población asturiana. Asina, en marzu del 2023 aprobóse’l Plan de Salú Mental 2023-2030, la fueya de ruta que marcó la planificación de midíes y recursos. Dempués, a finales del 2024, constituyóse’l Foru pola Salú Mental, un órganu asesor pa empobinar l’atención a la ciudadanía dende un enfoque comunitariu. Tres de la firma del Pactu pola Salú Mental, el branu pasáu, la nueva llei vien poner el ramu de tol procesu.
