El que foi’l primer Secretariu Xeneral de Comisiones Obreres de Xixón, Francisco Prado Alberdi, finó güei na nuestra ciudá a los 81 años, tres d’una vida dedicada a l’actividá sindical y política, tanto en CCOO como nel Partíu Comunista y Izquierda Xunida.
“El Pipes”, el nomatu col que se-y conocía nel sindicatu dende la clandestinidá, foi ún de los integrantes de la delegación asturiana na Asamblea de Barcelona, de la que’l próximu sábadu van cumplise 50 años y participó nes comisiones obreres na antigua UNINSA, formando parte del secretariáu de la organización mientres la dictadura.
Por ello, foi deteníu, torturáu y encarceláu en 1973, y tamién despidíu de la empresa. Escoyíu Secretariu Xeneral de CCOO Xixón en 1977, tuvo nel cargu pocu más d’un añu, reincorporándose darréu al so puestu de trabayu na entós ENSIDESA, tres de beneficiase de l’amnistía llaboral tres de la muerte del dictador.
Estremáu mientres dalgún tiempu de les responsabilidaes sindicales, participa en representación del Paríu Comunista d’Asturies nos trabayos d’ellaboración del Estatutu d’Autonomía. Darréu, una vegada creada Izquierda Xunida, va desempeñar el cargu de Coordinador Llocal.
En 1991 vuelve ser escoyíu Secretariu Xeneral de la Unión Comarcal de CCOO, permaneciendo nel cargu mientres dos mandatos. Nel 2010, el Conceyu de Xixón concéde-y la Medaya de Plata de la Villa de Xixón, en reconocencia a tola so trayectoria. En palabres de Jorge Espina, Alberdi ye “un referente fundamental de la izquierda xixonesa, asturiana y atreveríame a dicir que de toa España”. L’actual dirixente sindical destacó la so estensa trayectoria, señalando que “vamos llamentar fondamente’l so fallecimientu”.
