Los servicios nocherniegos regulares d’autobús dende La Pola Llaviana a Villa y dende Sama hasta Uviéu volverán funcionar a partir del vienres, 21 d’agostu, coles frecuencies y horarios habituales. El Consorciu de Tresportes d’Asturies (CTA) va restablecer la ufierta de búhos dempués de que la Inspección de Tresportes de la Conseyería de Movilidá, Medio Ambiente y Xestión d’Emerxencies constatara que los dos nuevos vehículos asignaos a les concesiones, que se van utilizar na prestación de les conexones nocherniegues, cumplen coles midíes establecíes pol plan de prevención de riesgos llaborales.
La empresa solicitó la adscripción de dos nuevos vehículos a la esplotación de les llinies. La inspección comprobó que los autobuses incorporaos a dambes concesiones pa operar el serviciu búho cumplen con toles especificaciones establecíes pol plan de prevención de riesgos llaborales, como la separación física del conductor y les persones viaxeres al traviés d’una mampara o un sistema internu de videovigilancia.
La conexón nocherniega va retomase esta fin de selmana cola ufierta habitual d’horarios, qu’inclúi seis frecuencies na llinia Sama-Uviéu ente les 23:30 y les 6:00 hores nes madrugaes del sábadu y el domingu. Nel casu de la ruta ente Llaviana y Villa ufierten cinco frecuencies dende les 23:00 a les 5:45 hores.