El PSOE acusa al Gobiernu municipal de tapecer los contratos de los Conciertos del Parque roblaos pol expresidente de Divertia, Oliver Suárez, que supuestamente motivaríen el so cese y el del xerente de la empresa municipal. El costu total de Los Conciertos del Parque 2026 xube a 754.291 euros, a los qu’hai que sumar 155.938 euros d’IVA. A esta cifra hai qu’añedir tamién los caxés de los artistes: 120.000 € p’Alejandro Sanz y 150.000 € pa Lola Índigo -nel d’Antonio Orozco nun hai un fixu pal artista-. Estos datos nun fixeron más que multiplicar les duldes de los socialistes. “Nun apurrieron tola información del programa Los Conciertos del Parque. Nos espedientes falten dos contratos que robló Oliver Suárez coles empreses organizadores de los conciertos d’Alejandro Sanz y Lola Índigo en septiembre y payares del 2025, respectivamente. ¿Por qué nun se facilitaron esos contratos? ¿Quier tapecer daqué l’equipu de Gobiernu?”, cuestiónase’l conceyal Antonio del Corro.
L’edil socialista alvierte que Divertia desembolsó en total más de 1’1 millones d’euros con una torna por venta d’entraes de cero euros. “Los ingresos de taquilla lleváronlos íntegramente les empreses organizadores, esto ye, una vegada más, dinero público pal beneficiu priváu d’unos pocos, lo habitual mientres toos estos años de xestión del Executivu de Carmen Moriyón”, añede.
Per otru llau, los socialistes punxeron el focu nos anexos de los contratos que sí consten nos espedientes, onde se recueye la cesión per parte de les promotores de 100 entraes per conciertu pa una zona privada instalada sobre una estructura elevada. L’arriendu, montaxe, instalación y desmontaxe d’esta estructura supunxo un costu de 50.820 euros pa les arques municipales. “Son en total 300 entraes VIP, pa “compromisos de Divertia”, que nun computen dientro de les localidaes vendíes. ¿Cuál foi’l destín final d’eses entraes? ¿Punxéronse a la venta? ¿Al traviés de qué canal? ¿A qué preciu? ¿Apurriéronse gratuitamente? ¿A quiénes? ¿Qué persones, empreses o entidaes tuvieron accesu a elles?”, pregunta del Corro.
El conceyal solicitó esta información formalmente a Alcaldía per aciu rexistru, asina como too aquello rellacionao col pagu de casi 50.000 euros en conceptu cáterin pa los trés conciertos del Parque d’Hermanos Castro: 29.049 euros pal d’Alejandro Sanz, 12.487 euros, 4.123 euros nel d’Antonio Orozco. “Nos contratos que nos facilitaron nun consta que Divertia tuviera que facese cargu del cáterin. El Gobiernu tien qu’esplicar por qué asumieron esi costu y quién lu esfrutó”, sorraya de la que conclúi: “cuando falamos de dinero público, la tresparencia nun pue ser una opción: tien que ser una obligación”.
