La Conseyería de Mediu Rural y Política Agraria, al traviés de los axentes d’Inspección Pesquera de la Dirección Xeneral de Pesca Marítima, prindó 31 quilos de centollu del Cantábricu y 20 santiaguinos en dos actuaciones llevaes a cabu los díes 19 y 20 d’agostu nos conceyos de Valdés y Navia.
La primer intervención desenvolvióse’l 19 d’agostu nel puertu de L.luarca. Mientres una inspección rutinaria, los axentes detectaron un vehículu con 31 quilos de centollu ensin la documentación obligatoria qu’acredita la so procedencia y comercialización. Esta especie ta en periodu de veda dende’l 1 d’agostu.
Arriendes d’esta actuación, al otru día realizóse otra intervención nuna nave industrial del conceyu de Navia. Ellí alcontraron 20 exemplares de santiaguinos fema con güeves, que la so tenencia ta espresamente prohibida pola normativa pesquera asturiana pa protexer la reproducción de les especies de crustáceos autóctones.
Como resultáu de dambes actuaciones, incoáronse les correspondientes dilixencies y denuncies pola tenencia d’especies pesqueres en dómina de veda, por escarecer de la documentación esixida y pola posesión de femes ovaes. Los exemplares prindaos fueron devueltos darréu al mar polos axentes d’Inspección Pesquera.
Medio Rural caltién de forma permanente los llabores d’inspección y vixilancia pa combatir el furtivismu y garantizar el cumplimientu de la normativa pesquera, especialmente mientres los periodos de veda y na protección de los exemplares reproductores, fundamentales pal caltenimientu de los recursos marinos.
