La Dirección Xeneral de Consumu retiró y destruyó mientres esti 7.577 xuguetes qu’incumplíen les esixencies llegales de seguridá, dientro de les actuaciones ordinaries de vixilancia y inspección que desenvuelve l’organismu dependiente de la Conseyería d’Ordenación del Territoriu, Urbanismu, Vivienda y Derechos Ciudadanos. La midida busca evitar riesgos pa la seguridá infantil derivaos de productos que nun cumplen a la normativa vixente.
La rede d’alertes del ministeriu dexó detectar estos xuguetes peligrosos. El director xeneral de Consumu, Faustino Zapico, esplicó que se trata d’artículos que nun cumplen la normativa vixente porque tienen una apariencia engañosa y tienen forma, color o golor d’alimentos y puen llevar a tracamundiu ente los neños pequeños y poner en peligru la so seguridá, por casu, al asonsañar tabletes de chicolate, frutes o pataques.
Les inspecciones desenvolviéronse tanto n’empreses mayoristes dedicaes a la distribución como n’establecimientos minoristes, especialmente bazares de distintes localidaes asturianes, con una mayor incidencia na zona central. Una parte significativa de les actuaciones en comercios minoristes tuvo’l so orixe en denuncies treslladaes pola Guardia Civil al Serviciu de Consumu.
Del total de productos destruyíos, 5.998 fueron alcontraos en distribuidores, 1.200 n’establecimientos minoristes y bazares, y otros 379 fueron retiraos mientres la Feria Internacional de Muestres d’Asturies.
Una vegada detectaos nel mercáu, los servicios de Consumu procedieron a la retirada y destrucción de los artículos. Ente los principales riesgos identificaos figura la posible ingestión de pieces pequeñes desprendibles, col consiguiente peligru d’ afogamientu.
