Recupérase l’homenaxe al profesoráu xubiláu con un actu que va axuntar a más de 500 antiguos docentes en La Llaboral

La Conseyería d’Educación va recuperar esti miércoles l’homenaxe al profesoráu xubiláu, tres de siete años consecutivos ensin celebralo. L’actu, que va tener llugar a les 17:00 hores nel Teatru de la Llaboral, en Xixón, va axuntar a más de 500 antiguos docentes que concluyeron la so etapa profesional ente los cursos escolares 2019-20 y 2025-26.

L’homenaxe, que lleva por lema Por cuanto nos habéis dado, quier sirvir d’agradecimientu tanto a los años de serviciu vocacional como los valores tresmitíos mientres la so estensa trayectoria. Ye tamién una reconocencia a la educación como xera colectiva y acumulativa, asina como preséu d’igualdá.

L’actu articúlase alredor de trés palabres llatines –artem, memoriam y honorem–, que dan nominación a les actuaciones, los testimonios y los discursos institucionales, respectivamente, y que se van dir enxareyando mientres el desenvolvimientu del eventu. L’apartáu artísticu compónse de dellos espectáculos de danza, drama y cantar coral, al cargu de docentes y alumnáu del Conservatoriu Profesional de Música y Danza de Xixón y de la Escuela Cimera d’Arte Dramático del Principáu.

El segundu bloque temáticu va tar protagonizáu por cuatro persones de distintes xeneraciones vinculaes a la educación, que van rellatar les sos esperiencies personales. Y na parte institucional, la directora xeneral de Personal Docente, María Antonia Vivanco, va intervenir de primeres del actu, mientres que la conseyera d’Educación, Eva Ledo, va encargase de la clausura.