El Gobiernu d’Asturies va vedar el salmón y va suspender la puya del campanu nel 2027 a pidimientu de les asociaciones de pescadores
La Conseyería de Mediu Rural y Política Agraria plantegó güei, nel senu del Conseyu de los Ecosistemes Acuáticos y de la Pesca n’Agües Continentales, vedar la pesca del salmón mientres tola campaña del 2027. Esta decisión va suponer tamién la suspensión de la tradicional puya del campanu. La iniciativa enmárcase nes actuaciones empobinaes a caltener la población de salmón atlánticu, que la so evolución sigue riquiendo midíes restrictives de xestión, magar la recuperación reparada en dellos indicadores mientres anguaño. La propuesta de normativa incorpora cambeos nos períodos, los cebos y les modalidaes de pesca, coles mires de reforzar la protección de los salmónidos y afacer la regulación de distintes especies y tramos fluviales.
En relación col salmón, la conseyería plantega’l zarru de la pesca mientres la próxima temporada, incluyida la captura y puya del campanu, como se denomina al primer salmón prindáu en cada ríu. Esta midida fuera plantegada poles sociedaes de pescadores. Nes zones salmoneres, tamién se propón adelantrar del 1 d’agostu al 15 de xunetu la prohibición d’utilizar como cebos maravayu y gusarapa, p’amenorgar les captures d’exemplares xuveniles. Coles mesmes, plantega adelantrase del 15 al 1 de xunu la prohibición d’emplegar esguila, viermes de tierra o merucos, asina como cebos artificiales que los asonsañen, col fin d’evitar captures accidentales de salmones.
La regulación inclúi un períodu específicu pa la pesca de la llubina, una especie depredadora de salmones xuveniles, que s’estendería dende’l tercer domingu de marzu hasta’l 15 d’agostu. La captura de llubines va permitise nes desembocadures y en determinaos tramos llibres de los ríos Seya, Deva, Nalón y Esva. Los cebos autorizaos van ser la xorra, el piscardo muertu, el vinilu y el pexe artificial. Tocantes a los antiguos cotos salmoneros, plantega caltenese la so ufierta como cotos de reu, con apertura’l tercer domingu de mayu pa la pesca de trucha y otres especies, ensin cambeos al respective de la regulación d’años anteriores.
La propuesta dexa la pesca con muerte los xueves nos banzaos de pesca intensiva y modifica la clasificación de dellos tramos fluviales. En concreto, plantégase que Barzaniellas, Texu y Roxicu, nel Narcea; El Capitán y La Uña, nel Sella; y Bartalo y El Pitu, nel Deva-Cares, pasen a ser zones llibres de pesca. Los cambeos previstos van incorporase, nel so casu, a la resolución añal que va regular la pesca n’agües continentales d’Asturies mientres 2027, una vegada concluyida la tramitación correspondiente.
Amás, va reforzase nel 2027 el sofitu a les sociedaes de pescadores fluviales, que la so collaboración resulta esencial pa caltener y ameyorar los ríos per aciu repoblaciones, caltenimientu d’instalaciones y siguimientu de les poblaciones piscícoles. Asina, ta previstu alzar la llinia d’ayudes a estes asociaciones de 95.000 a 150.000 euros, asina como incorporar subvenciones nominatives pa les entidaes que xestionen los centros ictiogénicos de Les Mestes, El Esmerillón y L’Asturiana, destinaes a impulsar los programes de cría y repoblación de salmón.
