Un total de 15.730 pelegrinos percorrieron y remataron los Caminos de Santiago per Asturies nel primer semestre d’esti añu, lo que representa una medra del 7,9% respectu al mesmu periodu de 2018, según datos publicaos pola Oficina del Pelegrín de Santiago de Compostela. En concreto, 7.983 persones optaron pel Camín de la Mariña, ente qu’otres 7.747 utilizaron el Camín Primitivu, lo que supón aumentos del 5,2% y del 10,8%, respectivamente.
El crecimientu del númberu de pelegrinos n’Asturies foi una constante a partir de 2015, añu en que la Unesco declaró Patrimoniu Mundial los Caminos de Santiago del Norte. Dende esa fecha, el total d’usuarios de les rutes xacobees asturianes esperimentó un crecimientu del 24,8%. La selmana pasada, la Conseyería de Cultura, Política Llingüística y Turismu entamó un viaxe d’axentes col operador especializáu Caminando Caminando, coles mires de desenvolver programes nos caminos d’El Salvador, el Primitivu y el Camín del Norte.
L’acción súmase al plan de promoción de la ruta xacobea desenvueltu pola Sociedá Pública de Xestión y Promoción Turística y Cultural, nel que se engloban otres actuaciones como la participación nel salón turísticu Fair Way, que tuvo llugar en Santiago de Compostela en febreru; la dedicación monográfica al Camín de Santiago del estand del Gobiernu del Principáu na pasada edición de la Feria Internacional de Muestres d’Asturies, el sofitu al proyectu Camino Escena Norte, presentáu esta mesma selmana, o la próxima visita a Asturies de representantes de la Oficina de Pelegrinación de Baviera.
