La 41 edición de la Selmana de les Lletres Asturianes aplázase hasta la seronda próxima. Esta cita celébrase, como ye tradición, a primeros del mes de mayu, coincidiendo col Día de les Lletres Asturianes. El Gobiernu asturianu, de común alcuerdu cola Academia de la Llingua Asturiana (ALLA), considera que la situación actual de la crisis del coronavirus aconseya l’aplazamientu de los actos previstos. Les feches definitives van marcase y anunciase más alantre.
El Gobiernu asturianu taba trabayando pa desenvolver la programación de la Selmana de les Lletres Asturianes ente los díes 4 y 8 del mes de mayu. El Día de les Lletres Asturianes, programáu pal 8 de mayu por parte de l’Academia de la Llingua, tamién foi aplazáu. La institución académica celebra nesa xornada la so xunta extraordinaria anual con un actu solemne nel Teatru Campoamor d’Uviéu. N’él, entrégase’l Premiu Nacional de Lliteratura, que nesta convocatoria foi otorgáu al escritor Xuan Xosé Sánchez Vicente.
La Selmana de les Lletres Asturianes que se conmemora anaulamente dende 1980, dedícase anguaño a la figura de la escritora María Teresa Villaverde (1881-1934), popularmente conocida col seudónimu de Tuxa. Ente otros actos, el programa incluye la celebración del tradicional Día del Llibru y de la Música n’asturianu y gallego-asturianu. Esti aplazamientu garantiza la organización y normal celebración de la principal cita anual de la lliteratura escrita n’asturianu y en gallego-asturianu.
