La Xunta Xeneral aprueba la modificación de la Llei de Cooperatives
El plenu de la Xunta Xeneral aprobó esta mañana por 42 votos favorables y nengunu en contra los cambeos plantegaos pol Gobiernu d’Asturies na Llei del Principáu 4/2010, de 29 de xunu, de Cooperatives. Estos cambeos, propuestos a pidimientu del sector, planteguen dellos axustes, buscando una meyor adaptación d’esti tipu de sociedaes a la situación actual, y col fin d’ameyorar dellos procedimientos societarios, según señaló’l conseyeru d’Industria, Empléu y Promoción Económica, Enrique Fernández.
Los artículos que se modificaron son los siguientes:
– Artículu 46 de la llei, col títulu Forma de convocatoria, pa dexar xuntes por medios telemáticos.
– Artículu 48, Llugar de l’asamblea, pa facilitar que los socios tamién puedan participar per medios telemáticos ensin necesidá de xuntes con calter presencial, como hasta agora.
– Artículu 70, relativu a les xuntes del conseyu rector, pa incluyir la posibilidá d’alcuentros telemáticos.
– Artículu 101, relativu al Fondu d’Educación y Promoción Cooperativa, p’ampliar los usos y destinos d’esa partida económica.
El conseyeru d’Industria señala qu’estos cambeos dan respuesta a les nueves necesidaes de les cooperatives y sociedaes llaborales, al afaer el so funcionamientu internu a los cambeos derivaos de la pandemia, de la que les dota de mayor operatividad, ensin alteriar l’espíritu y la naturaleza d’estes empreses.
