El candidatu de la FSA-PSOE a la presidencia del Principáu, Adrián Barbón, participó esti sábadu na Fiesta de la Oficialidá de Bimenes onde se comprometió a trabayar pa «salvar l’asturianu de la so desapaición». En declaraciones a los medios, destacó que la reforma del Estatutu d’Autonomía precisa’l respaldu de 27 diputaos y que, nesti momentu, los partios favoratibles a la oficialidá (PSOE, Podemos ya IX) sumen 26 diputaos. «Falta un diputáu y nun sabemos lo que va pasar, anque la llexislatura ye bien llarga», puntualizó.
Nesti contestu, destacó que «la primer reflexón que tenemos que faer ye qu’hai que salvar l’asturianu de la so desapaición. Hai que faer tolo que tea na nuesa mano por qu’una parte de la nuesa cultura, la nuesa forma de ser como asturianos nun se pierda». Barbón aseguró tar convencíu de que «la llingua de los nuesos güelos hai que treslladala tamién a los nietos».
«El patrimoniu inmaterial tamién ye patrimoniu cultural y nun podemos dexar que se pierda»
«El patrimoniu inmaterial tamién ye patrimoniu cultural y nun podemos dexar que se pierda», repitió. El candidatu defendió un modelu «ensin sectarismos nin imposiciones», pero poniendo per delantre «que los asturianos teamos arguyosos de la nuesa tradición».
El secretariu xeneral de la FSA-PSOE asistió esti sábadu a la Fiesta de la Oficialidá de Bimenes. Adrián Barbón yá s’allegó a esta cita n’anteriores ediciones como alcalde de Llaviana y como candidatu a la presidencia del Principáu. «Si unu quier reivindicar la nuesa cultura, el nuesu patrimoniu inmaterial y la nuesa llingua eso tiense que xestualizar y tien qu’haber una espresión».
Amás d’Adrián Barbón, en Martimporra diéronse cita Gimena Llamedo, los alcaldes socialistes de Nava, Colunga y Cabrales, y Luz Pontón, secretaria de Normalización Llingüística. La Fiesta de la Oficialidá cuntó col actu institucional a cargu del alcalde de Bimenes, Aitor García Corte, y el pregón de l’actriz María Cotiello. La danza de la oficialidá y el pasucais pesllaron la 23 edición de la Fiesta de la Oficialidá.
