El presidente del Principáu, Adrián Barbón, presentó la candidatura del chef José Andrés al Premiu del Senáu al Impulsu de los Valores Democráticos y los Derechos Humanos. L’Executivu considera que’l restaurador mierense emigráu a Estaos Xuníos axunta los méritos necesarios pa llograr esti galardón que la Cámara Alta convoca per primer vegada.
La propuesta del Gobiernu d’Asturies fai referencia a la “perbrillante carrera” de José Andrés nel campu de la gastronomía. Igualmente, detalla les reconocencies que llogró a lo llargo de la so trayectoria, ente otros, el Premiu Princesa d’Asturies de la Concordia en 2021, el Outstanding Chef Award qu’otorga la Fundación James Beard, la National Humanities Medal y tamién la Medaya d’Asturies, que va recibir anguaño en septiembre.
“Por aciu el so llabor d’ayuda alimentaria en World Central Kitchen llevó a cabu programes de capacitación culinaria, recaldación de fondos, promoción de persones y comunidaes y asistencia nutricional en situaciones d’emerxencia en diversos llugares del mundu”, recueye’l testu.
José Andrés, nacíu en Mieres del Camín en 1969, ye unu de los chefs españoles con mayor proyección internacional. En formándose con Ferrán Adrià en elBulli, en 1991 establecióse n’Estaos Xuníos, primero en Nueva York, onde trabayó n’El Dordo Petit, y darréu en Washington, dende onde rexenta anguaño un ampliu grupu de restoranes de prestixu. Amás del so llabor culinariu y la so condición de cocineru universal, ye exemplu de compromisu pol so ONG World Central Kitchen, cola que dende 2010 reparte comida a persones afectaes por graves crisis como’l terremotu d’Haití, el furacán María de Puertu Ricu, el volcán de la isla de La Palma o, más apocayá, la invasión rusa d’Ucraína.
