El miércoles 3 de xineru el Centru Municipal Integráu de L’Arena acoyó’l primer conceyu d’Aína en Xixón. Inscrites en Xixón participaron nesti alcuentru dientru d’un clima constructivu y marcáu poles ganes de trabayar en positivo. D’esta manera, el partíu plantó la semiente pa que xorreza un nuevu asturianismu políticu basáu na cercanía, el pragmatismu y con propuestes pa construir una ciudá y un país con mayor xusticia social y arguyosu de la so identidá.
Con hora y media de duración, n’actividá fízose un diagnósticu mui críticu cola situación
social, económica y cultural d’Asturies y de Xixón. Cuestiones como la despoblación y
l’avieyamientu de la población, les llistes d’espera nes guarderíes y na sanidá, la turistificación, la contaminación, el problema d’accesu a la vivienda, la pérdida d’identidá y comunidá nos barrios o’l retrocesu cultural y asociativu; fueron dalgunos de los temes trataos.
Pa dar respuestes, acolumbráronse los primeros exes sobre los qu’Aína podría entamar el so llabor políticu en Xixón: defender el fortalecimientu y desarrollu de los servicios públicos; ufrir respuestes a la crisis demográfica y económica; trabayar por una vida digna y pola revitalización cultural dende los barrios de la ciudá.
A mediaos d’esti mes va volver haber un nuevu conceyu abiertu pa que puedan participar les demás persones inscrites d’Aína que nun lo pudieron facer ayeri, asina como otra xente que tenga enfotu nel proyectu. Dempués d’esta nueva toma de contactu, va convocase a primeros de febreru la primer Asamblea Llocal de Xixón, zarrada yá a quienes den el pasu d’afiliase na formación y na qu’escomenzarán a definise les llinies d’aición política.
