El gobiernu d’Asturies llogró un alcuerdu col Ministeriu d’Educación pa la reconocencia de la especialidá docente d’asturianu y eonaviegu. Dambes alministraciones ufierten asina respuesta a una demanda histórica, pola que n’Asturies se trabaya dende va años, ensin qu’hasta agora fuera posible algamar una solución satisfactoria.
El Gobiernu d’España anunció que va modificar la normativa estatal col fin de que les llingües autóctones d’Asturies puedan cuntar con una especialidá docente. La última solicitú plantegada pol gobiernu asturianu al ministeriu, a la qu’agora se da respuesta, sofítase en dos premises fundamentales: d’una banda, la protección y promoción de les llingües autóctones, recoyida tanto na llei d’usu de 1998 como na Carta Europea de les Llingües Rexonales o minoritaries; d’otra, la situación d’enllargada interinidá del profesoráu que les imparte, un fechu que contravien los criterios del Estatutu Básicu del Empleáu Públicu.
La Llei 1/1998, de 23 de marzu, d’usu y promoción del bable/asturianu, establez nel so artículu 9 que’l Principáu, nel exerciciu de les sos competencies, va asegurar la enseñanza de les llingües autóctones y va promover el so usu dientro del sistema educativu. Pela so parte, la Carta Europea de les Llingües Rexonales Minoritaries, que reconoz la llingua asturiana como tal, fixa una serie de compromisos pa impartir estes materies nes diferentes etapes educatives.
El gobiernu d’Asturies reconoz qu’esiste un abusu de temporalidá colos profesores y les profesores d’asturianu y eonaviego, qu’entepasen en demasía el máximu de trés años como funcionarios interinos previstu na llei del Estatutu Básicu del Emplegáu Públicu, yá que nun esisten mecanismos pa convocar les places al nun tar reconocida la especialidá docente.
L’alcuerdu alcanzáu ente les dos alministraciones va ayudar a ameyorar sustancialmente les condiciones llaborales y l’estabilidá d’esti colectivu. Amás, da respuesta a ún de los compromisos recoyíos nel Pactu Asturies Educa, suscritu va un añu y concebíu como fueya de ruta pa fortalecer la escuela pública.
Nel cursu escolar qu’acaba de rematar, el sistema educativu asturianu cuntó con un total de 318 docentes de les dos llingües autóctones: 295 d’asturianu (211 d’Infantil/Primaria y 84 de Secundaria) y 23 de eonaviego (17 d’Infantil/Primaria y 6 de Secundaria).
La matriculación n’asturianu y eonaviego aumentó esti cursu un 34,2%, con un total de 30.782 estudiantes. Esti crecimientu, que se rexistra per cuartu añu consecutivu, respuende en parte a la introducción d’esta ufierta nel segundu ciclu d’Infantil (3-6 años) como elección voluntaria.
