Un estudiu de la Universidá d’Uviéu sobre la influencia de los hermanos Somolinos na arquitectura asturiana, desenvueltu pol estudiante Alejandro Braña Barcia, alzóse col premiu del Comité Español d’Hestoria del Arte (CEHA) al meyor Trabayo Fin de Máster (TFM) del añu 2023. El galardón destaca’l rigor de la investigación y el maduror na redacción que presenta l’estudiu, tutorizáu pola caderalga n’Hestoria del Arte María del Pilar García Cuetos.
El trabayu, tituláu Somolinos arquitectos: les obres pa Valle, Ballina y Fernández, céntrase na parte más desconocida d’un estudiu que caltuvo la so actividá ente los años 1934 y 1975 y al que s’atribúin grandes proyectos como Perlora, la Casa Sindical d’Uviéu o l’edificiu del cine Aramo. Con él, Braña remató’l Máster Universitariu n’Estudios Avanzaos n’Hestoria del Arte: Investigación y Xestión.
Gracies a esta reconocencia, el TFM d’Alejandro Braña Barcia va ser publicáu na páxina web
del CEHA. Amás, va recibir un premiu económicu, un diploma acreditativu y la inscripción al Comité Español d’Hestoria del Arte mientres dellos años. La Xunta Directiva del CEHA decidió por unanimidá premiar el trabayu del estudiante de la Universidá d’Uviéu, que destacó sobre’l restu de les candidatures.
El galardón va ser apurríu nel marcu del XXV Congresu del Comité Español d’Hestoria del Arte, que se va celebrar en Murcia ente’l 30 de setiembre y el 3 d’ochobre de 2025, dáu’l so calter biañal.
“Ye un prestu enorme, un premiu que reconoz l’esfuerzu y la dificultá d’encarar un tema pocu tratáu primeramente”, celebra l’estudiante de la Universidá d’Uviéu. Alejandro Braña Barcia pon en valor, amás, que la so investigación xira alredor d’Asturies y a una parte de la so hestoria qu’anguaño sigue desenvolviendo nel programa oficial de Doctoráu n’Hestoria del Arte y Musicoloxía. La so tesis va siguir centrándose nel llabor de los hermanos Somolinos. “Quédanos entá muncho camín y elementos interesantes por afayar y poner en valor”, apuesta.
