Alicia Flórez Berdasco, inxeniera ya investigadora de la Universidá d’Uviéu, recibió en Madrid el primer premiu del concursu «Xóvenes inxenieros/es por un mundu meyor», qu’apurre l’Institutu de la Inxeniería d’España (IIE). La primer edición d’esti galardón nacional reconoció la so contribución a facilitar la vida de les persones con discapacidá visual cola aplicación de nueves tecnoloxíes, al traviés d’un proyectu tituláu Diseñu d’antenes pa un sistema radar d’ayuda al desplazamientu autónomu de persones con discapacidá visual.
El primer premiu del certame, patrocináu pola Fundación Mutualidá de la Inxeniería, ta dotáu con 1.250 euros. El certame dirixióse a mozos inxenieros ya inxenieres de tol país que, de manera individual o nel equipu, desenvolvieren proyectos ente los años 2022 y 2024 con potencial pa contribuyir a un mundu meyor. Los criterios d’evaluación incluyíen l’impactu n’árees clave como la meyora social, la innovación, la sostenibilidá ambiental, el tresformamientu dixital o’l emprendimientu.
Alicia Flórez Berdasco amosóse “mui agradecida” pola reconocencia, que recoyó apocayá nun eventu celebráu en Madrid, nel que pudo conocer proyectos d’otros compañeros y compañeres d’oficiu y “compartir idees”. “Ye mui gratificante que’l trabayu y l’esfuerzu invertíos seyan reconocíos d’esta manera. Esti llogru refuerza la mio motivación pa siguir desenvolviéndome y siguir buscando formes d’ameyorar la calidá de vida de les persones al traviés de la innovación”, espresó la investigadora.
