Álvaro Muñiz: «Ana González va tener la oposición que Moriyón nun tuvo»

El candidatu de Foru a l'Alcaldía asegura que "vamos liderar l'alternativa a un modelu que nun compartimos, pero que ye l'escoyíu democráticamente polos xixoneses”

0
966
Álvaro Muñiz, nel conceyu caltenía col PSOE ayeri en Xixón. / Foru
Álvaro Muñiz, nel conceyu caltenía col PSOE ayeri en Xixón. / Foru

Foru va llevar a cabu una una «oposición lleal» en Xixón. Álvaro Muñiz tresmitió-y a Ana González que la so formación va tener «la oposición que Carmen Moriyón nunca tuvo: rigorosa y cola mano tendida siempres al diálogu y los alcuerdos». Fízolo mientres un conceyu col Comité Negociador del PSOE de Xixón, que calificó de «cordial y constructivu».

Muñiz añadió que «Foru, como únicu partíu que gobernó esta ciudá amás del PSOE, va liderar l’alternativa». Aseguró nun compartir «el modelu de los socialistes», pero reconoció «que ye l’escoyíu democráticamente polos xixoneses». Anunció que la formación nun va presentar candidatu a l’Alcaldía y va abstenese na investidura d’Ana González. «Ye un xestu qu’esperamos seya recibíu como una invitación a esi diálogu, esa llealtá institucional que Carmen Moriyón, por desgracia, nunca esfrutó”. Muñiz añadió, amás, que «el trespasu de poder va ser tresparente, llimpio, y sobremanera, lleal a los intereses de tola ciudá».

Muñiz acudió al conceyu acompañáu polos tres conceyales que van representar a la formación na Casa Conceyu: Jesús Martínez Salvador, Ana Braña, y Rubén Hidalgo. Hai que recordar qu’Álvaro Muñiz renunció al acta de conceyal. «Voi siguir lliderando’l partíu y voi tar arreyáu al 100% en tolo qu’asoceda nel Conceyu de Xixón y nel grupu municipal», esplicó entós. Y detalló que la so decisión taba motivada pol deséu de que’l númberu cuatro de la llista, Rubén Hidalgo, ocupara un asientu nel Plenu.