Un total de 96.858 estudiantes d’Infantil, Primaria, Secundaria y Bachilleratu empecipiaron güei el cursu escolar 2026-2027 n’Asturies. El nuevu añu académicu va tar marcáu pola culminación del pactu Asturies Educa, el mayor aumentu de profesoráu de la historia y l’afitamientu del gobiernu asturianu ente les comunidaes que más recursos destinen a la enseñanza pública.
Amás, per primer vegada, les 105 escueles del primer ciclu d’Educación Infantil (0 a 3 años) operatives n’el Principáu’Asturies empiecen el cursu de forma simultánea col restu d’etapes educatives. Nelles tán matriculaos anguaño 4.358 neños y neñes.
La matrícula n’Infantil, Primaria, Secundaria y Bachilleratu amenorga esti cursu en 1.861 estudiantes respectu al añu pasáu, lo que representa un descensu del 1,8%. A pesar d’esta evolución demográfica, el Gobiernu d’Asturies caltién el so apueste por reforzar los recursos humanos p’ameyorar la calidá del sistema educativu.
N’Infantil y Primaria tán escolarizaos 54.579 alumnos y alumnes, un 1,88% menos que nel cursu anterior. D’ellos, 38.687 cursen los sos estudios na rede pública y 15.892 na concertada, con descensos del 2,18% y del 1,14%, respectivamente. Xixón sigue siendo’l conceyu con mayor númberu de matriculaciones nestes etapes, con 14.252 estudiantes, siguíu d’Uviéu, con 12.895.
Secundaria y Bachilleratu sumen 42.279 estudiantes, lo que supón una cayida del 1,89% respectu al pasáu cursu. La rede pública concentra 32.293 matrícules y la concertada, 9.986. En términos porcentuales, l’amenorgamientu ye del 2,45% na enseñanza pública y del 0,05% na concertada. Tamién nestes etapes Xixón encabeza’l númberu d’estudiantes, con 11.450, mientres qu’Uviéu rexistra 10.261.
