El Conseyu de Gobiernu aprobó ayeri, nuna xunta telemática estraordinaria, la ufierta d’empléu públicu (UEP) de 2022, que va dexar convocar 2.092 places col fin de siguir amenorgando la temporalidá na Alministración, los sos organismos y entes públicos, y fomentar la promoción interna del personal fixo. La ufierta d’anguaño nun trai l’ampliación de la plantiya, yá qu’inclúi places yá esistentes, dotaes presupuestariamente, pero ocupaes por personal temporal.
El desglose de les places ye’l siguiente:
– 844 pertenecen a personal estatutariu del Serviciu de Salú del Principáu (Sespa). Estos puestos (40% del total) inclúin a médicos especialistes y de familia, pediatras, enfermeros y técnicos de cuidos o auxiliares d’enfermería, ente otres categoríes.
– 664 correspuenden a los cuerpos docentes (32% del total), de les que 519 diríxense a profesores de Secundaria y 145 son pa procesos de promoción interna.
– 425 afecten a los cuerpos de funcionarios de l’Alministración del Principáu y 159 a personal llaboral de les distintes categoríes. En total, son 584 places, que representen el 28% d’esta ufierta, con un especial pesu de la promoción interna.
L’oxetivu d’esta ufierta ye convocar procesos selectivos que respeten los principios de méritu y capacidá, pa que l’empléu temporal esistente pase a ser fixu, una vegada celebraos los procedimientos d’accesu oportunos. Por tanto, nun s’amonta’l númberu d’emplegaos públicos, sinón que s’amenorga la temporalidá, acordies con les esixencies llegales.
Esta UEP ye la segunda que s’aprueba en 2022 y va executase mientres los próximos trés años, una vegada realícense los procesos selectivos venceyaos a la ufierta estraordinaria de estabilización aprobada en mayu, que da cumplimientu a la llei estatal de 28 d’avientu de 2021 de midíes d’amenorgamientu de la temporalidá nel empléu públicu. La ufierta estraordinaria, que los sos procesos selectivos yá tán convocaos na so práctica totalidá, va facer posible l’afitamientu de 8.416 places na Alministración del Principáu, lo que va dexar asitiar la interinidá per debaxo del 8%.
