El Gobiernu d’Asturies empecipió güei la negociación del presupuestu autonómicu pa 2025 con dos oxetivos claves: fortalecer l’estáu de bientar y aprovechar al máximu la capacidá inversora. Les polítiques de vivienda y mocedá, mesmo que l’afayadiza atención a la salú mental, destaquen ente les prioridaes de cara al próximu añu.
Les cuentes van reflexar los compromisos recoyíos nel documentu de concertación social y van incluyir midíes empobinaes al tresformamientu económicu de la comunidá, con especial atención a la I+D+i y a la formación de les persones nueves. Tamién van demostrar el sofitu a los conceyos asturianos pa facer frente al desafíu demográficu.
El presidente, Adrián Barbón, encabezó na tarde d’ayeri la ronda de contactos con representantes del Partíu Popular y Foro Asturies y cola diputada Covadonga Tomé, del grupu parlamentariu mistu.
El conseyeru de Facienda informó de que’l proyectu de presupuestos pal próximu añu va rondar los 6.350 millones y el techu de gastu va asitiar ente los 5.300 y los 5.400. Amás, indicó que los ingresos provenientes del modelu de financiamientu autonómicu van amenorgase llixeramente, de la que van menguar tamién les partíes de los fondos europeos, tanto del Mecanismu de Recuperación y Resiliencia (MRR) como del Fondu de Transición Xusta (FTJ).
Estes estimaciones, xuníes a la recuperación de les normes d’estabilidá presupuestaria, van provocar un amenorgamientu de les cuentes que, según esplicó Peláez, va compensase en parte gracies a la bona marcha de la economía y del mercáu llaboral.
El titular de Facienda indicó que’l proyectu de presupuestos pal próximu añu va garantizar la suficiencia de los servicios públicos fundamentales y va caltener l’impulsu inversor, gracies a l’aplicación sostenida d’una política fiscal coherente. «Tamos énte una gran oportunidá pa responder a la demanda de la ciudadanía de llevar a cabu una política útil», valoró tres la ronda de contactos.
