El Gobiernu d’Asturies aumentó per tercer añu consecutivu la dotación presupuestaria destinada a la convocatoria d’ayudes pa la realización d’obres de caltenimientu, restauración o rehabilitación n’horros, paneres y cabazos, mesmo qu’otros elementos d’interés etnográficu. La Viceconsejería de Cultura, Política Llingüística y Deporte destina anguaño 450.000 euros pa la convocatoria, 100.000 euros más qu’en 2023 y el triple qu’en 2021.
El Boletín Oficial del Principáu d’Asturies (Bopa) publica güei la convocatoria, que va tar abierta dende mañana hasta’l 12 de febreru. Pa optar a los fondos, los horros, paneres, cabazos o otros elementos d’interés etnográficu tendrán de tar incluyíos con un nivel de protección integral nos catálogos urbanísticos municipales aprobaos con posterioridá a la entrada a valir de la Llei de Patrimoniu Cultural de 2001 (llei 1/2001).
En casu de tar allugaos en conceyos que nun cunten con un catálogu aprobáu con posterioridá a la citada llei, los elementos tendrán de ser anteriores a 1940 y constituyir amueses notables pola so talla, decoración, característiques constructives o por formar conxuntos. Nun van poder allegar a la convocatoria aquellos elementos que seyan Bienes d’Interés Cultural o los que formen parte del Inventariu del Patrimoniu Cultural d’Asturies.
