Los datos de la Encuesta de Población Activa confirmen la recuperación económica d’Asturies, la quinta comunidá onde más menguó’l desempléu en términos interanuales.
El desempléu baxó n’Asturies en 1.600 persones mientres el segundu trimestre del añu, lo que supón un amenorgamientu del 2,57 %, hasta asitiar la cantidá de paraos y paraes en 61.480, según datos de la Encuesta de Población Activa (EPA) publicada esta mañana pol Institutu Nacional d’Estadística (INE), Con esta baxada, la tasa autonómica de paru asitia nel 13,64 %, cuasimente dos puntos perbaxo de la media nacional, del 15,26 %.

En términos interanuales —esto ye, al respective del segundu trimestre del añu pasáu— la baxada ye del 2,07 %. Asturies foi la quinta comunidá autónoma na que más mengua’l desempléu. La evolución ye más favorable que nel estáu, yá que nel conxuntu nacional el paru calculáu pola EPA incrementóse un 5,22 %.

Estos datos ponen de manifiestu la progresiva recuperación del empléu y de l’actividá económica del país, un fechu que confirmen les cifres d’ocupación, yá qu’ente los meses d’abril a xunu creáronse 4.200 puestos de trabayu n’Asturies al respective del trimestre anterior.

La evolución ye muncho más favorable en términos interanuales si tenemos en cuenta que nel añu últimu recuperáronse 17.300 empleos, con una crecedera de la ocupación del 4,66 %.

Como yá indicaren encuestes anteriores, caltiénse la recuperación del empléu na construcción y na industria, con 3.600 y 1.000 empleos trimestrales más, respectivamente.

Al respective de la población activa, asitióse en 450.000 persones. En términos intertrimestrales producióse una medría del 0,58 %, frente a la medría nacional del 1,55 %.