La Conseyería de Cultura, Política Llingüística y Turismu editó Derechu llingüísticu del Principáu d’Asturies. Normativa y xurisprudencia, el primer compendiu xurídicu qu’axunta tola llexislación y xurisprudencia de los últimos 40 años tocante a la llingua asturiana y l’eonaviegu.
El trabayu ye obra del abogáu y académicu correspondiente de la llingua Nicolás Bartolomé Pérez y va presentase al públicu’l xueves, 30 de marzu, a les 19:00 hores na biblioteca del Colexu d’Abogaos d’Uviéu. La publicación del volume busca poner nes manes de la sociedá asturiana, los operadores xurídicos y les alministraciones públiques un manual de consulta sobre’l derechu llingüísticu asturianu que recueya la normativa vixente y que pueda dir actuaklizándose nel futuru a midida que se xenere nueva llexislación. La presentación del llibru cuerre a cargu del profesor de la Universidá d’Uviéu y lletráu del Tribunal Constitucional José Manuel Pérez.
El llibru estructúrase en cuatro grandes apartaos. Hai una primer sección onde s’analiza la evolución del réxime xurídicu de les llingües propies d’Asturies, un estudiu del autor que repasa los más destcacaos fitos normativos, que nacen nel plurillingüismu español que reconoz la Constitución Española de 1978 y que tienen la so primer norma p’Asturies nel artículu 4 del Estatutu d’Autonomía. Nesa introducción Nicolás Bartolomé revisa los pasos esenciales que da la xurisprudencia n’Asturies, siendo la Llei 1/98 d’Usu y Promoción del Bable/Asturianu la principal referencia.
Depués recuéyese una compilación de normes de rangu internacional (onde destaca la Carta Europea de Llingües Minoritaries), nacional, autonómicu y local aplicables tanto al asturianu como al eonaviegu.
Tamién s’atopa una recopilación de tola xurisprudencia existente emanada del Tribunal Constitucional, del Tribunal Supremu y del Tribunal Superior de Xusticia d’Asturies y una partida d’anexos qu’incluyen documentación de tipoloxía variada como resoluciones administratives, planes de normalización llingüística, ordenances municipales, informes, convenios, etc. Finalmente, la obra complétase con una bibliografía estensa de referencia y consulta sobre la materia.
D’esta publicación faise edición en papel, non venal, y edición dixital, que se pon a disposición de toles persones interesaes.
