Asturies recibió 1.263.161 turistes que xeneraron 3.526.442 pernoctaciones l’añu pasáu, según los datos publicaos pol Institutu Nacional d’Estadística (INE). Les cifres de visitantes y estancies de 2020 representen descensos del 46,4% y 38,8%, respectivamente, en relLación al añu anterior. Son los porcentaxes menos desfavorables de los rexistraos poles comunidaes autónomes. La cayida media de turistes algamó nel estáu’l 66,3% y la de pernoctaciones, el 69.3%.
El desglose por sectores d’agospiamientu n’Asturies cifra los descensos de turistes nel 52,5% para los hoteles, el 12% en campings, el 32,7% n’apartamentos turísticos y el 36,4% nel turismu rural. Tocantes a les pernoctaciones, los hoteles rexistraron una baxada del 50,5%, los campings del 4,4%, los apartamentos turísticos del 22,4%, y los establecimientos rurales del 25,8%.
La viceconseyera de Turismu, Graciela Blanco, manifestó qu’estos datos “confirmen qu’Asturies s’afitó como’l destín con mayor grau de seguridá para los turistes”. Nesti sentíu, avanzó que “vamos reforciar el nuesu apueste pola seguridá como factor determinante pa la recuperación del sector nel curtiu y mediu plazu”.
Nesta mesma llinia, Blanco aludió al informe de perspectives turístiques d’Exceltur espublizáu’l 20 de xineru, que constata que “la comunicación en mercaos emisores de la seguridá sanitaria de los destinos españoles, una vegada controlada la situación epidemiolóxica, va ser un elementu clave pa impulsar la recuperación”.
Esti mesmu informe coincidió en señalar qu’Asturies foi la comunidá autónoma que “meyor aguantó”, magar que rexistró descensos na facturación hotelera del 44% y del 53% en ventes. En rellación a les perspectives empresariales, Exceltur señala que “dientro de la falta de certidumes y el sentimientu empresarial negativu con al respective de 2021, los destinos vacacionales de predominiu de demanda nacional alcontraos na mariña y el norte d’España son los que revelen mayor capacidá de recuperación”. Asturies ye precisamente la comunidá que menos espera amenorgar el so nivel de facturación con al respective de 2019.
El Programa de Garantía y Reactivación Turística del Principáu, puestu en marcha la pasada primavera, contemplaba acciones por más d’ocho millones en favor del sector. Esti plan permitió acometer dende midíes pa incentivar el consumu a acciones pa la meyora de la comercialización, amás de la puesta a disposición del sector d’accesu a financiamientu en condiciones preferentes.
Al pie d’estes actuaciones, el Gobiernu d’Asturies destinó’l pasáu mes de payares 19,6 millones n’ayudes directes a autónomos y empreses p’apangar los daños de la pandemia. D’esta forma, en total, el sofitu económicu movilizáu pol Gobiernu d’Asturies en favor del conxuntu del sector algama los 28 millones.
…
