La estación Puerta de Atocha Almudena Grandes de Madrid acueye dende güei la campaña de promoción turística que’l Gobiernu del Principáu d’Asturies punxo en marcha pa xenerar espectación nel públicu madrilanu énte la próxima llegada del tren d’alta velocidá que va conectar Madrid con Uviéu n’aprosimao trés hores a partir del mes de mayu.
Un total de 14 ventanales xigantes y delles pantalles dixitales van esibir el mensaxe De Madrid al Paraísu: Asturies, cada vez más cerca, sobre paisaxes del occidente, centru y oriente asturianu, y so imaxes de cielu abiertu que conviden a “volver a lo natural, a l’harmonía, a alendar, a vivir una aventura”, ente otros mensaxes motivadores. La instalación d’esta acción publicitaria, considerada de marketing espectacular pol gran impactu que xenera na audiencia, ta llevando dellos díes por cuenta de la so complexidá, polo que va llucir completa mañana.
Mientres les próximes hores, la marca Asturies Paraísu Natural tamién va llucir nos 100 metros de barandiella de la cinta tresportadora que trescurre so les siete bóvedes tematizadas cola campaña asturiana na terminal de llegaes de l’AVE.
Esta ye la primera de les acciones previstes pol Gobiernu del Principáu p’aprovechar la ventaya competitiva que va suponer cuntar a partir de mayu cola conexón ferroviaria d’alta velocidá a Asturies. El plan completu va ser presentáu’l próximu miércoles 18 de xineru nel marcu de la Feria Internacional de Turismu (Fitur) que se celebra dende’l 18 al 22 de xineru nel recintu IFEMA de Madrid.
