El Principáu lidera’l consorciu del proyectu 3F Green Model, del Programa Interreg Europa, pa l’adaptación de la cadena de valor agroalimentaria y forestal al Pactu Verde y la economía circular. La iniciativa ta dotada con 1.033.144 euros y ye la primer d’estes característiques a nivel nacional.
El proyectu pretende contribuyir al desenvolvimientu económicu, ambiental y social caltenible, por aciu l’intercambiu d’esperiencies y bones práctiques ente los socios, col fin d’avanzar na meyora de la xestión de subproductos y borrafes agroganaderos. El consorciu ta formáu por socios de cinco países. Asina, amás d’Asturies, que representa a España, participen Szombathely (Hungría), Cork (Irlanda), Sicilia (Italia) y Vidzeme (Letonia).
El conseyeru de Mediu Rural y Cohesión Territorial, Alejandro Calvo, participó güei na primer sesión de trabayu del grupu. Los socios van compartir proyectos de xestión de borrafes agroganaderes, forestales y agroalimentaries en marcha. Amás, van intercambiar esperiencies sobre fórmules de collaboración nel campu de la economía circular. Asturies cunta col sofitu d’organismos d’investigación públicos como Ficyt y Serida, y privaos, como Cetemas y Asincar.
Ente otros oxetivos, el consorciu va encetar la xestión de los purinos ganaderos y la xeneración de biogás, de forma que puedan llograse fertilizantes aptos p’agricultura ecolóxica y cerrar asina’l ciclu. El Gobiernu d’Asturies tamién pretende potenciar el tresformamientu de borrafes agroalimentarios, como la magaya de sidra o los sueros lácteos, en subproductos d’altu valor, como’l carbón activáu y aditivos ricos en minerales.
El programa del alcuentru inclúi visites a instalaciones que son una referencia na xestión de borrafes na comunidá, como les plantes de Biogastur, en Navia, y la de xestión de borrafes de Cogersa, en Xixón.
La iniciativa 3F Green Model foi escoyida ente más de 170 propuestes de toa Europa, cuenta con financiamientu del Fondu Européu de Desenvolvimientu Rexonal (Feder) y va desenvolvese hasta 2026. El trabayu final va enfocar a desenvolver normes que dean soluciones a problemes prácticos.
