La marca Asturies, Naturaleza Minera, cola qu’Asturies va promocionase como destín de turismu industrial, yá ta en marcha. El logotipu, qu’inclúi los perfiles d’un castillete y un monte, va convivir col lema oficial Asturies Paraísu Natural en tolos soportes y acciones promocionales pa espublizar los recursos industriales de la comunidá.
“Esta nueva marca apela a la vinculación histórica del nuesu territoriu cola minería y tamién a la esencia, a la cultura, a una idiosincrasia acomuñada a la realidá social d’esa industria. Coles mesmes, fai referencia directa a la naturaleza qu’invade tola redolada del patrimoniu industrial”, esplicó Blanco.
La presentación del sellu tuvo llugar mientres la inauguración del I Foru Internacional de Turismu Industrial Mineru celebrada nel Pozu Sotón, en Samartín del Rei Aurelio. Tanto’l llanzamientu de la nueva marca como la organización del propiu foru formen parte del plan de promoción que Turismu punxo en marcha p’avanzar na desestacionalización y na sostenibilidá del sector.
Mientres la so intervención, la viceconseyera repasó les principales ventayes competitives del turismu industrial de la comunidá, como la singular simbiosis ente lo industrial y lo rural, con equipamientos que s’alluguen en redolaes de gran valor paisaxísticu, o la variedá de recursos venceyaos cola industria -más de trenta-, gran parte de los cualos tienen de mancomún la so relación cola minería.
El plan d’allugamientu de turismu industrial va vese reforzáu nos dos próximos años con una inversión de 1,5 millones procedentes de los fondos europeos Next Generation, que van dexar trabayar na meyora d’equipamientos, el diseñu de rutes especializaes, y l’adaptación de la ufierta al mercáu estranxeru. “Nel diseñu d’esta estratexa va cuntase cola collaboración de tolos axentes implicaos”, señaló Blanco.
