Asturies va entrar el llunes na tercer fase de la desescalada. L’anunciu fízolo esta mañana’l ministru de Salú, Salvador Illa, na rueda de prensa posterior al conseyu de Gobiernu. D’esta manera, tol territoriu asturianu va entamar la fase 3 de la desescalda’l llunes y va caltenese nella mientres les dos vinientes selmanes, hasta’l 21 de xunu, cuando remate l’estáu d’alarma. El Principáu solicitó’l cambéu de fase pa tol territoriu, pero recuerda que ta dispuestu a suspender l’avance nesti procesu si se rexistren biltos incontrolaos.

La tercer fase ye la cabera de la desescalada enantes de la recuperación de lo que yá se conoz como «nueva normalidá». El Gobiernu asturianu ta siguiendo con esmolecimientu los datos rexistraos nes residencies de mayores El Carmen, de Xixón, y Santa Teresa, d’Uviéu. Nel primer casu detectáronse 19 positivos, quince de residentes y cuatro de trabayadores; y nel segundu, cuatro, tres de residentes y una trabayadora.

Artículos venceyaosMás del autor