Asturies peslló’l primer semestre del añu colos meyores datos turísticos de tola serie histórica: 883.775 visitantes y 1.842.346 pernoctaciones, según reflexa l’últimu informe publicáu güei pol Institutu Nacional d’Estadística (INE). Nel balance xeneral de xineru a xunu, el númberu de viaxeros aumentó un 2,5% respectu al mesmu períodu de 2018. Y superóse nel mesmu porcentaxe les cifres del primer semestre de 2017, añu que marcó’l récord turísticu d’Asturies, con una suma añal de 2.333.377 visitantes.
Tocantes a les pernoctaciones, crecieron un 6,2% en comparanza col primer semestre de 2018 y un 3,5% respectu al mesmu períodu de 2017. La crecedera ye especialmente significativa nel casu del turismu internacional, que sigue calteniendo un enclín constante a l’alza. En concretu, los visitantes estranxeros amontaron nun 7,2% y les sos nueches d’estancia aumentaron un 7,7% en comparanza col primer semestre de 2018.
Otru de los aspeutos más destacaos del últimu informe del INE ye que la xubida de les pernoctaciones ye común a toles tipoloxíes d’agospiamientu. Los valores van del 2,9% nos hoteles al 26,8% de los campings. En términos d’empléu, la plantiya de los establecimientos turísticos algamó en xunu los 8.900 emplegaos, lo que supon una medría del 4,6% sobro’l mesmu mes del añu pasáu y del 8,2% sobro mayu.
