Asturies acueye dende güei y hasta’l xueves varios exercicios de simulación de quemes forestales nos conceyos de Tinéu y Valdés nel que se va esplegar un ampliu dispositivu integráu por profesionales de les alministraciones estatal y autonómica. Nel operativu van participar miembros del Serviciu d’Emerxencies del Principáu (Sepa), axentes medioambientales, el Quintu Batallón d’Intervención n’Emerxencies de la Unidá Militar d’Emerxencies (UME) y la Brigada de Refuerzu en Quemes Forestales (BRIF) de Tinéu, dependiente del Ministeriu pa la Transición Ecolóxica y el Retu Demográficu (Miteco).
El Sepa va apurrir dos helicópteros, un camión de puestu de mandu avanzáu (PMA) —que se va instalar nel Centru d’interpretación de los Focetes del Esva, nel valle de Paredes (Valdés)— y una ventena de vehículos, ente autobombas y unidaes terrestres.
L’exerciciu tien como oxetivu reforzar la preparación frente a quemes forestales y poner a prueba la capacidá de reacción y coordinación ente les distintes alministraciones y los equipos qu’intervienen nuna emerxencia de gran escala.
La simulación va incluyir dellos escenarios que van dexar practicar maniobres d’ataque directu ya indirectu al fueu, tanto con ferramienta manual como con maquinaria pesada. Ente les actuaciones previstes figuren quemes d’enanche, contrafuegos y trabayos de perimetración y remate con esbrozadores y bulldozer.
Tocantes a los medios aéreos, amás de comprobar la so coordinación y operatividá conxunta, l’exerciciu va sirvir pa evaluar el funcionamientu de los puntos d’agua portátiles de la UME en combinación colos helicópteros del Sepa.
Al marxe de les técniques d’estinción, el simulacru va afrontar tamién situaciones como’l confinamientu o evacuación de poblaciones afectaes, asina como atrapamientos o accidentes del propiu personal d’intervención. Estos supuestos van implicar l’activación de distintos medios y recursos d’emerxencia.
