Asturies va participar la selmana próxima na 18 edición de Madrid Fusión. La comunidá va presentase nel que ta consideráu’l congresu de restauradores más importante d’España, como sede de los World Cheese Awards 2020, que va celebrase en payares n’Uviéu.
La presencia asturiana nel congresu va tener el so momentu más relevante na clase maxistral Los quesos del Paraíso Natural interpretaos poles Estrelles Michelín. Va celebrase’l llunes 13 a les 14:00 hores nel Escenariu Polivalente. Los protagonistes d’esta demostración van ser los cuatro quesos asturianos con Denominación d’Orixe Protexida (Cabrales, Gamonéu, Casín y Afuega’l Pitu) integraos na marca Alimentos del Paraíso Natural, que van convertise na base pa les creaciones culinaries d’Isaac Loya, del Real Balneariu de Salinas; José Antonio Campoviejo, d’El Corral del Indianu; Ricardo Sotres d’El Retiro, y Jaime Uz, d’Arbidel.
Asturies cunta na actualidá con más de 50 variedaes d’artesanales. La marca Alimentos del Paraíso Natural ampara a los quesos protexíos por Denominación d’Orixe Protexida y por Indicación Xeográfica Protexida, como Quesu Los Beyos. Tamién a los de producción ecolóxica y a los certificaos autorizaos pola Conseyería de Desenvolvimientu Rural, Agroganadería y Pesca, como son los ellaboraos por queseros integraos na Asociación de Queseros Artesanos.
