Asturies recibe solicitúes de 26 conceyos na segunda convocatoria d’ayudes pa crear nueves places de 0 a 3 años

La Conseyería d’Educación recibió solicitúes de 26 conceyos interesaos en participar na segunda convocatoria de subvenciones pa financiar la creación de nueves places públiques nel primer ciclu d’Infantil (de 0 a 3 años). El presupuestu d’anguaño xube a 6,35 millones –casi’l doble qu’en 2022- y va financiase con cargu al Plan de Recuperación, Tresformamientu y Resiliencia.

Los 26 conceyos que presentaron solicitúes, ocho más que na convocatoria anterior, son los siguientes: Bual, Cabrales, Caravia, Grandas de Salime, Les Regueres, Llanera, Onís, Parres, Valle Bah.u de Peñamellera, Quirós, Ribadeva, Riosa, Santiso d’Abres, Santalla d’Ozcos, Sotu’l Barcu, Tapia , Villayón, Ayer, Avilés, Cangues d’Onís, Grau, Mieres, Navia, Piloña, Pravia y Valdés. D’ellos, 17 aspiren a crear nueves escueles y los 9 restantes opten a ampliar les esistentes.

Los técnicos de la conseyería tán revisando les solicitúes. Una vegada rematáu esti trámite, una comisión de valoración va evaluar los proyectos y va emitir una propuesta provisional de concesión de les ayudes. Darréu va abrise un periodu d’allegamientos antes de presentar la propuesta definitiva, que tien como plazu máximu’l 3 de xunetu.

Trés modalidaes d’ayudes

La convocatoria establez que se van sovencionar aquellos gastos realizaos ente’l 1 de xineru y el 31 d’avientu de 2023. El pagu va ser antemanáu.

El programa d’impulsu a la escolarización nel primer ciclu d’Educación Infantil contempla trés modalidaes d’ayudes, destinaes siempres a la creación de nueves places de 0 a 3 años:

–   Pa la construcción d’un nuevu edificiu o pa la rehabilitación integral d’un inmueble. Estes sovenciones pueden algamar los 150.000 euros per unidá.

–   Pa l’ampliación esterior d’aules n’edificios yá esistentes. Estes ayudes tienen una llende máxima de 90.000 euros.

–   Pa obres interiores d’adaptación de centros en funcionamientu. Estes sovenciones algamen un máximu de 70.000 euros.

Les ayudes, convocaes pola Conseyería d’Educación, pretenden impulsar y estender la rede asturiana d’escueles infantiles, que na actualidá ta formada por 74 centros, que suman 4.293 places, distribuyíes en 46 conceyos.

La Conferencia Sectorial d’Educación asignó a Asturies una cuantía total de 13,3 millones pa crear 1.300 places nueves nel ciclu de 0 a 3 años hasta setiembre de 2024.