Asturies rexistra un casu de listeriosis ensin vinculación cola carne mechada

0
750
Asturies rexistra un casu de listeriosis ensin vinculación cola carne mechada
D'izquierda a derecha, el xerente de la área IV, Luis Hevia; el conseyeru de Salú, Pablo Fernández Muñiz; el director xeneral de Salú Pública, Antonio Molejón, y el xefe de Microbioloxía del HUCA, Fernando Vázquez.

L’Hospital Universitariu Central d’Asturies (HUCA), n’Uviéu, rexistró un casu de listeriosis nun paciente de 64 años ingresáu na Unidá de Cuidos Intensivos (UCI). Trátase d’un casu clínicu aislláu d’afección pola bacteria Listeria monocytogenes, que nun guarda nenguna relación col biltu aniciáu n’Andalucía por consumu de carne mechada de la marca La Mechá. L’enfermu permanez na UCI, ta recibiendo tratamientu y evoluciona favorablemente.

El conseyeru de Salú, Pablo Fernández Muñiz, axuntóse esti miércoles nel HUCA col xerente de la área IV, Luis Hevia, el director xeneral de Salú Pública, Antonio Molejón, y el xefe del Serviciu de Microbioloxía, Fernando Vázquez, para recibir información sobro’l casu.

El 10% de la población ye portadora de la bacteria ensin qu’haya riesgu pal so salú. Nesta ocasión, trátase d’un enfermu inmunodeprimíu, con tratamientos antibióticos previos pa tratar otros xermes. L’hospital echó voz del casu al serviciu de Vixilancia Epidemiolóxica, como marca’l protocolu n’enfermedaes de declaración obligatoria (EDO). Amás, como en tolos casos d’afección por esta bacteria, el HUCA va unviase una amuesa del cultivu tomáu al Institutu Carlos III pa que faiga un tipaxe del xenoma del xerme, que se va incluyir na so base de datos. Mientres anguaño, rexistráronse 13 casos aisllaos por listeriosis n’Asturies.