El Rexistru Español de Donantes de Médula Ósea (REDMO) contabilizó hasta ochobre 889 donantes asturianos nuevos, superando los 860 rexistraos l’añu pasáu. En total, 10.837 asturianos tán inscritos en REDMO. Na actualidá, España cunta con más de 400.000 donantes de médula. Amás, el rexistru dispón de 65.000 unidaes de sangre de gordón umbilical.
L’oxetivu del Plan Nacional de Médula Ósea (PNMO) ye algamar el mediu millón de donantes en 2022. Pa ello, llanzó una campaña de captación de nuevos donantes, especialmente varones ente 18 y 40 años, col lema ‘Un match x una vida’, que va percorrer 17 ciudaes.
Tresplantes hematopoyéticos n’Asturies
N’Asturies, realizáronse hasta ochobre d’anguaño 72 tresplantes hematopoyéticos, de los que 45 son autólogos (con célules del mesmu paciente) y 27 aloxénicos (con célules d’un donante que puede ser un familiar o non). D’estos postreros, en 14 casos nun había relación de parentescu ente donante y receptor.
La probabilidá d’atopar un donante idénticu na familia va del 25 al 30%, polo que la mayoría de los pacientes tienen qu’atopar un donante non emparentáu a partir de los rexistros de donantes. Más del 90% de los pacientes atopen un donante compatible antes de dos meses. La media ye de 30 díes. A nivel mundial, existen 36 millones de donantes de médula ósea. Cuando un equipu médicu español solicita un donante, el Rexistru Español de Donantes de Médula Ósea (REDMO) buscar per tol mundu. La posibilidá d’atopar un donante de médula non familiar compatible ye de 1 ente 4.000.
Tresplantes hematopoyéticos n’España
Desque se punxo en marcha’l Plan Nacional de Migollu, a finales de 2012, el númberu de donantes multiplicóse por cuatro y les donaciones efectives aumentaron nun 477%. N’España, más de 60.000 pacientes recibieron un tresplante de proxenitores hematopoyéticos. En 2018, realizáronse más de 3.300, de los que 2.084 fueron autólogos y 1.294 aloxénicos.
El tresplante de proxenitores hematopoyéticos (TPH) ye un tratamientu consolidáu pa múltiples enfermedaes neoplásiques como leucemies, mielomes, linfomes, ente otres, mesmo n’otres patoloxíes como inmunodeficiencies, enfermedaes metabóliques, hemoglobinopatíes y enfermedaes autoinmunes.
