La Vuelta a España Femenina by Carrefour.es va apostar la so etapa final n’Asturies el próximu 10 de mayu. El Gobiernu d’Asturies patrocina esti eventu dientro de la so estratexa de promoción de la comunidá, qu’inclúi una firme apueste pol cicloturismu, un nichu de mercáu que favorez la desestacionalización turística.
La vicepresidenta, Gimena Llamedo, asistió esta tarde en Barcelona a la presentación d’esta ronda ciclista, un escaparate escepcional pa promocionar Asturies pol so ampliu impactu nacional ya internacional. Asturies, amás, asitió’l cicloturismu como unu de los sos productos estratéxicos baxo la marca Ciclismu por Naturaleza.
La etapa decisiva d’esta edición va xunir la localidá llionesa de La Robla col altu de Cotobello, n’Ayer, a 1.195 metros d’altitú. Con 152 kilómetros, va ser la más llarga y montuna de la ronda ciclista, al incluyir un doble pasu entemediu pola Colladona, de 840 metros d’altitú, que va dexar endurecer el percorríu antes del ascensu final.
Al marxe de los puertos de monte, la caravana va travesar los conceyos de L.lena, Ayer, Llaviana, Samartín del Rei Aurelio y Mieres.
