El Gobiernu d’Asturies autorizó güei la firma del protocolu d’intenciones col Conceyu de Xixón y el Real Sporting de Xixón pa impulsar la candidatura Asturies 2030 al mundial de fútbol que se va celebrar n’España en 2030. En virtú del documentu, los trés partes comprométense a collaborar, de manera coordinada, pa consiguir qu’Asturies seya una de les sedes de la competición; en concretu, l’estadiu El Molinón-Enrique Castro ‘Quini’.
Esta declaración d’intenciones supon un primer pasu para definir una fueya de ruta, “de calter programáticu y lo más detallada posible”, qu’ayude a consiguir qu’Asturies se convierta en see del campeonatu. L’oxetivu que s’escuerre en primer llugar ye que l’estadiu, de propiedá municipal, resulte escoyíu, con cuenta de, una vegada cumplíu esi fin, llogre axuntar los requisitos necesarios por que se apuesten ellí los partíos correspondientes.
Debío a que na actualidá l’estadiu municipal nun cumple toles especificaciones técniques esixíes pa convertise en see del mundial, les trés instituciones van cooperar pa encetar aquelles actuaciones que dexen qu’El Molinón axunte tales condiciones. Les trés entidaes coinciden en que la Copa Mundial de Fútbol de 2030 constitúi una oportunidá “única ya inmeyorable” non solo pa impulsar la reforma integral del equipamientu y les sos condiciones d’esplotación, sinón tamién pa favorecer la modernización y el desenvolvimientu económicu d’Asturies.
El protocolu, que va tener una vixencia inicial de cuatro años, nun implica gastu dalgunu pa les partes, ensin perxuiciu de que darréu se concreten convenios, alcuerdos o otros actos xurídicos nos que puedan reflexase compromisos de financiamientu.
Pa garantizar l’impulsu, evaluación, vixilancia y control de les actuaciones previstes, va formase una comisión de siguimientu compuesta por representantes de los trés partes de manera equitativa. Nel senu d’esti órganu, va escoyer de mutuu alcuerdu a una persona encargada de la coordinación y celebración de les sesiones, que van tener calter periódicu y que les sos decisiones adoptar por unanimidá.
