El Gobiernu d’Asturies y la Delegación del Gobiernu van realizar el martes 28 de xineru un simulacru d’emerxencia que va incluyir l’unviu de mensaxes a los teléfonos móviles de la población al traviés del sistema ES-Alert. Esta ferramienta de protección civil dexa l’espardimientu xeneralizáu ya inmediata d’alertes nuna zona afectada por una emerxencia o catástrofe, al traviés de notificaciones a los móviles de les persones que s’atopen conectaes a les redes de telefonía dientro d’un área determinada.
L’exerciciu va basase na simulación d’una emerxencia énte un avisu coloráu por nieve de l’Axencia Estatal de Meteoroloxía con acumuladures d’hasta 40 centímetros nel cordal y los Picos d’Europa y de ente 40 y 20 centímetros na zona central y los valles mineros. En total, van vese afectaos 39 conceyos y cerca de mediu millón d’habitantes. Esta situación va tener un grau d’intensidá mui importante, con cortes de carretera, árboles cayíos, puertos de monte zarraos o con cadenes, falta de suministru llétricu y de telefonía o poblaciones incomunicaes.
La secuencia del exerciciu va empezar cola activación, per parte del conseyeru de Fomentu, Cooperación Local y Prevención de Quemes, Alejandro Calvo, del Plan Territorial d’Emerxencies d’Asturies (Platerpa) en situación 2. En movilizando los medios y recursos previstos nesa fase, plantégase’l treslláu d’información a la población al traviés de distintos medios, ente ellos, el sistema ES-Alert. Pa ello’l conseyeru, como director del plan d’emerxencia, va unviar el mensaxe d’alerta a la Dirección Xeneral de Protección Civil del Ministeriu del Interior pa qu’active el sistema que va dexar facelo llegar a la población diana del simulacru.
Los usuarios de teléfonos intelixentes (smartphones) conectaos a les antenes de telefonía móvil asitiaes nos 23 conceyos afectaos van recibir esta notificación, que se va visualizar de forma similar a un mensaxe de testu, ocupando tola pantalla, y va venir acompañada d’un pitíu y una vibración de dellos segundos.
Les árees a les que va llegar son les siguientes:
Área central y valles mineros: Balmonte, Bimenes, Cabranes, Candamo, Grau, Llangréu, Llaviana, Llanera, Mieres, Morcín, Nava, Noreña, Uviéu, Proaza, Les Regueres, La Ribera, Riosa, Salas, Samartín del Rei Aurelio, Santo Adriano, Sariegu, Siero y Tameza.
Cordal y Picos d’Europa: Ayer, Amieva, Cabrales, Cangues d’Onís, Casu, L.lena, Onís, Parres, Peñamellera Baxa, Peñamellera Alta, Piloña, Ponga, Quirós, Sobrescobiu, Somiedu y Teberga.
L’oxetivu del exerciciu ye dar a conocer esta ferramienta y ameyorar los protocolos de comunicación y respuesta frente a graves riesgos. Per un sitiu, va ayudar a la población a familiarizase con esti sistema d’alertes énte un riesgu inminente y que, de la mesma, aplique les midíes de protección tresmitíes. Per otra parte, supón un entrenamientu pa los sistemes de protección civil d’Asturies y va dexar comprobar el grau de cobertoria de la telefonía móvil y l’accesu de les distintes operadores na zona escoyida pal exerciciu.
