Asturies trató güei xuntu col restu de comunidaes y el Ministeriu de Consumu la necesidá d’establecer una collaboración más estrecha sobro los rexistros d’accesu a los locales de xuegu (rexistros de prohibíos).
Esta cuestión, abordada nel senu de la Comisión Sectorial del Conseyu de Polítiques del Xuegu, foi reclamada reiteradamente dende’l Principáu como requisitu imprescindible pa garantizar la protección integral de les persones que carecen una patoloxía rellacionada colos xuegos d’azar y les apuestes.
El ministeriu ye partidariu de que cada autonomía decida sobre la integración de los correspondientes rexistros, polo que’l gobiernu d’Asturies pretende plantegar al Gobiernu central la suscripción d’un conveniu pa materializar esa integración de la información que remanen dambes alministraciones y reforzar la protección de les persones vulnerables.
Per otra parte, el Boletín Oficial del Principáu (Bopa) publica güei’l decretu aprobáu pol Conseyu de Gobiernu’l pasáu vienres pol que s’establecen restricciones en materia de xuegos y apuestes y afítense los criterios que van rexir la concesión d’autorizaciones n’Asturies. La publicación de la norma, que conxuga la crecedera ordenada del sector cola protección de los colectivos más vulnerables, coincide cola celebración del Día Internacional del Xuegu Responsable.
El gobiernu d’Asturies amosó dende 2016 un decidíu compromisu coles polítiques de xuegu responsables, empobinaes escontra la sensibilización sobro les consecuencies d’una práctica inadecuada. Nesti sentíu, entamó cinco alcuentros y xornaes col oxetivu fundamental de sirvir como foru de reflexón y puntu d’alcuentru pa encetar, dende distintes perspectives, les estratexes de prevención frente al xuegu patolóxicu.
La última xornada tuvo llugar l’añu pasáu nel IES Mata Jove, de Xixón, yá que’l sistema educativu ye un de los ámbitos d’actuación prioritarios pa concenciar sobro los riesgos asociaos al xuegu y les apuestes. L’andanciu del coronavirus torgó entamar actividaes similares nos últimos meses.
