Asturies y la so gastronomía, col respaldu de la marca Cocina de Paisaxe, volverán ser protagonistes, per segundu añu consecutivu, del espaciu más esclusivu de Madrid Fusión: la so Sala VIP. Esta área, diseñada pol Principáu para la ocasión, ufierta accesu preferente pa ponentes y prescriptores d’alcance internacional, que van visitar el principal certame d’esti tipu del país, que se celebra en Ifema del 29 al 31 de xineru.
Trés embaxadores de la marca Cocina de Paisaxe van amosar les sos propuestes gastronómiques nesti singular recintu: María Busta, de Casa Eutimio (Llastres, Colunga), el 29 de xineru; Lara Roguez, de Abarike (Xixón), el martes 30, y Ramona Menéndez, de Casa Belarmino (Mazaneda, Gozón), el miércoles 31.
A la demostración de María Busta va sumase tamién Luis Alberto Martínez, de Casa Fermín (Uviéu). Xuntos van preparar, a cuatro manos, un menú que va sirvir pa presentar la ciudá d’Uviéu como Capital Gastronómica d’España 2024, y que va cuntar con dalgunos de los platos más representativos de les principales xornaes culinaries de la capital asturiana.
La Sala Vip va disponer tamién d’una zona dedicada a delles de les ellaboraciones más cuidaes y emblemátiques d’Asturies, como la producción quesera, la denominación d’orixe protexida Sidra d’Asturies o les indicaciones xeográfiques protexíes Choscu de Tinéu y Xata d’Asturies, toes elles amparaes pola marca calidable Alimentos del Paraísu Natural.
