La Conseyería de Cultura, Política Llingüística y Turismu entama mañana llunes, 26 de xunu, una xornada destinada a les federaciones deportives sobre la promoción de la igualdá y lainclusión nel deporte. La iniciativa enmárcase dientro de la campaña Deporte ensin apellíos, puesta en marcha pola Dirección Xeneral de Deporte dientro del Plan Social del Deporte financiáu con fondos europeos Next Generation.
Una trentena de federaciones van participar na convocatoria, que tien por oxetu esponer midíes que promuevan la igualdá de xéneru y la inclusión de les persones con discapacidá. La directora xeneral de Deporte, Aida Nuño, va inaugurar l’alcuentru, que se va abrir a les 18:00 hores na sala de cristal del Palaciu d’Esposiciones y Congresos d’Uviéu.
Mientres la sesión van encetase distintes propuestes que favorezan la igualdá y la inclusión nel deporte. Pa ello, va cuntar con persones espertes que van encetar el tema al traviés de charres y una mesa de trabayu común.
P’amosar les posibles iniciatives que puedan tomase dende caún de los ámbitos profesionales y de xestión venceyaos al deporte, el diseñu del panel de ponentes inclúi perfiles bien distintos. Van tomar parte como ponentes na xornada María José Rienda Contreras, expresidenta del Conseyu Cimeru de Deporte y exsecretaria d’Estáu pal Deporte; Laura Álvarez, periodista deportiva en Eurosport; María Paloma Jiménez Calvo, responsable de Relaciones Internacionales del Comité Paralímpico Español; Alberto Suárez Laso, atleta medallista paralímpico y Jessica Alonso Bernardo, medallista olímpica de balonmano.
Deporte ensin apellíos tien como oxetivu romper la fienda de xéneru y normalizar ente l’alumnáu y el profesoráu la igualdá a tolos niveles, tanto na práctica deportiva como nos equipos directivos de les entidaes deportives, nos cuerpos técnicos y nel arbitraxe. La campaña tamién va promocionar un deporte inclusivu, nel qu’haya espaciu pa persones con y ensin discapacidá.
Un total de 32 deportistes, árbitres y entrenadores asturianes participaron yá na primer fase de la campaña, desenvuelta en 60 centros educativos non universitarios d’Asturies. L’oxetivu ye que les neñes y adolescentes atopen puntos de referencia pa sumase a la práctica deportiva rompiendo los tabúes y barreres qu’esisten históricamente.
