Xixón al día

Autor: xixonaldia

  • Tania Blanco gana’l VIII Premio Muséu Barjola d’artes plástiques col so proyectu espositivu «Gas, óxido, sal»

    Tania Blanco gana’l VIII Premio Muséu Barjola d’artes plástiques col so proyectu espositivu «Gas, óxido, sal»

    L’artista asturiana Tania Blanco ganó la octava edición del Premio Muséu Barjola d’artes plástiques cola so obra «Gas, óxido, sal». Esti galardón, que convoca la Conseyería de Cultura, Política Llingüística y Deporte, conceder al meyor proyectu espositivu creáu específicamente pa la capiya de la Trinidá del Muséu Barjola de Xixón y ta dotáu con 6.200 euros.

    El xuráu, presidíu pol director xeneral de Patrimoniu Cultural, Pablo León, alcordó por unanimidá premiar esti proyectu, qu’apurre narratives relevantes sobre l’alcuentru del paisaxe natural ya industrial asturianu y la so percepción. Tania Blanco consigue resignificar, al traviés del arte, materiales y borrafes que recuerden los efectos del antropocenu nel territoriu nuna propuesta de calidá poética y crítica.

    L’artista

    Tania Blanco (Uviéu, 1987), ye llicenciada en Belles Artes pola Universidá de Salamanca y cuenta con un máster n’Educación Artística y Pedagoxía de la Universidá Complutense y otru de Diseñu Gráficu y Preimpresión de la Escuela Aula Creativa de Madrid. Completó dos ciclos cimeros de Grabáu y Estampación na Escuela d’Arte y Restauración de Llión y de Cerámica Artística na Escuela d’Arte de Cádiz.

    Tien una abondosa trayectoria espositiva con amueses individuales dende 2012 en galeríes d’Asturies, Castiella y Llión y Euskadi. Amás, representó a Asturies nel Festival Intercélticu de Lorient, na Bretaña francesa, en 2019.

    Col proyectu agora premiáu, amplía les sos últimes investigaciones al rodiu de la contaminación industrial en Xixón, en concretu na zona d’Aboño y Sotiello. Afita la so atención en cómo les borrafes industriales tiñen el mediu que los arrodia (muries, carreteres, güertes) y evidencia la entrada nuna nueva dómina, l’antropocenu, que se consolida y faise visible nestos llugares nos que la llinia ente l’espaciu natural y l’industrial empieza a disolvese.

  • Barbón reivindica les reformes como frenu a la meyora reaccionaria na apertura de los cursos de branu d’UXT

    Barbón reivindica les reformes como frenu a la meyora reaccionaria na apertura de los cursos de branu d’UXT

    El presidente d’Asturies, Adrián Barbón, reivindicó’l papel tresformador de les reformes sociales ya industriales como respuesta a la puxanza de los movimientos reaccionarios. “N’Asturies y n’España, el que reforma, gana”, afirmó mientres la so intervención na 25ª edición de la Escuela Internacional de Verano Manuel Fernández López “Lito”, entamada por UXT Asturies col lema “Tiempu de reformes, tiempu de resistencies”.

    Barbón empezó la so intervención contestualizando el momentu políticu actual, marcáu pol crecimientu de fuerces que cuestionen el feminismu, la diversidá, l’Estáu de bienestar y el respetu a les riegles democrátiques. “Nun basta con aguantar, como dicía Camilo José Cela. Pa vencer, hai qu’avanzar”, afirmó, sollertando de que l’alternativa a la izquierda yá nun ye una derecha conservadora, sinón una involución antisistema que tien nel trumpismu’l so principal referente.

    Énte esti escenariu, el presidente sorrayó que la izquierda nun puede dexase’l paralís nin el mieu. “Quieren qu’arrenunciemos a les reformes. Pues, xusto, al contrariu, l’axenda social tien que ser siempres el nuesu estandarte”, señaló, reivindicando les polítiques impulsaes pol Gobiernu asturianu como exemplu de compromisu cola mayoría social.

    Ente les midíes destacaes, Barbón mentó la reforma del IRPF que beneficia al 80% de los contribuyentes, el pactu educativu Asturies Educa con una inversión de 45 millones d’euros, la gratuidá del accesu a la Universidá d’Uviéu dende esti cursu, el lideralgu n’inversión sanitaria por habitante y l’oxetivu d’empecipiar 1.000 viviendes públiques en dos años. “Van poder criticanos por munches coses, pero nun tienen d’escaecer les nueses señes: somos el gobiernu de l’axenda social”, afirmó.

    Amás, el presidente aportunó na necesidá de reforzar la política industrial como complementu imprescindible de la transición ecolóxica. Reclamó mayor axilidá a la Comisión Europea nel esplegue de midíes de sofitu a sectores estratéxicos como la siderurxa, y pidió al Gobiernu d’España garantíes pal suministru enerxéticu. “Si la UE pon les piles y el Gobiernu central cumple, la puxanza industrial y económico d’Asturies ta bien aseguráu”, aseguró.

    Barbón sofitó les sos palabres con datos que reflexen la evolución positiva de la comunidá: el paru per debaxo de les 50.000 persones, cerca de 400.000 empleos, l’impulsu del sector de la defensa con iniciatives como la compra del tallerón de Duru, y más de 60 proyectos empresariales dispuestos a invertir 5.000 millones n’Asturies.

    La intervención concluyó con una apelación al trabayu conxuntu ente gobiernos, partíos y sindicatos d’izquierda, faciendo del diálogu social una ferramienta permanente. “La fola reaccionaria ye tarrecible, pero podemos vencela si nun encoyemos énte’l so emburrie. Nada d’atrincheranos, faigámonos líderes del cambéu”, sentenció.

  • La Universidá d’Uviéu da empiezu al cursu académicu cola bienllegada al estudiantáu nuevu

    La Universidá d’Uviéu da empiezu al cursu académicu cola bienllegada al estudiantáu nuevu

    La Universidá d’Uviéu arrinca’l cursu académicu 2025-2026 el próximu martes, 9 de setiembre. Para dar la bienvenida al estudiantáu de nuevu ingresu, les facultaes y centros celebren ente los díes 2 y 11 les Xornaes d’Acoyida, que tienen por oxetivu amosar les instalaciones y servicios de la institución académica. Al traviés d’un calendariu de sesiones informatives y visites, l’alumnáu va tener el so primera toma de contactu cola vida universitaria antes d’empezar el periodu lectivu.

    Con esta iniciativa, l’estudiantáu va poder afayar el centru nel que va desenvolver el so grau, recibir información básica sobre la so titulación o los servicios que la Universidá d’Uviéu pon a la so disposición, mesmo que conocer los sos derechos y deberes, les víes d’orientación de les que disponen o les posibilidaes de participación. “Les Xornaes d’Acoyida son una propuesta aparente por que quien empiecen los sos estudios de grau afayen el so centru y a quien van ser los sos compañeros y compañeres mientres los próximos años”, aseguró’l vicerrector d’Estudiantes y Empleabilidá, Alfonso López Muñiz, animando a participar a tol estudiantáu de nuevu ingresu. El centru encargáu d’abrir la programación esti añu va ser la Facultá de Química, que tien prevista una sesión informativa pa mañana martes, 2 de setiembre, ente les 9:30 y les 13:30 hores na Aula 02. Les Xornaes d’Acoyida van rematar el próximu día 11 de setiembre en Ciencies, con una sesión de bienvenida prevista pa les 13:00 hores.

  • 37.000€ por un quesu Cabrales, el más caru del mundu

    37.000€ por un quesu Cabrales, el más caru del mundu

    Recór nuevu nel 53 Certame Quesu Cabrales de 2025 cola ufierta final de la puya pol meyor quesu Cabrales, con 37.000. Con esta, yá son cinco les vegaes que la celebración quesera bate’l récor Guinnes, superando en 1000€ a cantidá que pagó el mesmu Iván Suárez, d’El Llagar de Colloto, va un añu. Tamién repitió la quesería ganadora, que foi la Quesería Ángel Díaz Herrero.

    Na última edición, el Llagar de Colloto volvió ser protagonista al desembolsar nada menos que 36.000 euros pol quesu ganador, ellaboráu pola quesería Ángel Díaz Herrero. Nun ye un fechu aislláu: l’establecimientu yá inscribiera’l so nome nel Llibru Guinness en delles ocasiones, faciéndose con pieces en puya qu’algamaron cifres de 14.300 euros en 2018, 20.500 en 2019 y 30.000 en 2023.

    Baxo la dirección d’Iván Suárez, el local atropa amás una racha destacada: nos cinco últimes ediciones celebraes llevó siempres el quesu meyor puntuáu pol xuráu, que prueba unu a unu los exemplares antes de proclamar al vencedor. En 2022, tres el paréntesis obligáu pol andanciu de la covid, yá invirtieren 17.000 euros na pieza ganadora. Con esti nuevu trunfu, sumen seis reconocencies consecutives. Como vien asocediendo nos últimos años, un 15% del importe pagu va destinase nuevamente a l’Asociación Galbán, xestu solidariu que se repite per cuarta ocasión consecutiva.

    Na puya pol meyor Quesu Cabrales participaron La Montera Picona de Ramón (Xixón), Sidrería Román (Xixón), Carlos Tartiere (Madrid), el Camping Las Gaviotas (Castrillón), Lo de Viole (Madrid), El Dólar (Uviéu), Sidrería La Cuenca (Madrid) y El Carbayín (Madrid).

     

  • Barbón destaca l’ameyoramientu de la situación nes quemes forestales gracies al agua y al «esfuerzu titánicu” de tol operativu que trabaya na so estinción

    Barbón destaca l’ameyoramientu de la situación nes quemes forestales gracies al agua y al «esfuerzu titánicu” de tol operativu que trabaya na so estinción

    El presidente d’Asturies, Adrián Barbón, destacó güei l’ameyoramientu na situación de les quemes forestales, de lo que solamente una se considera activa, n’Ibias, gracies al agua y al esfuerzu titánicu” de too l’operativu que trabaya na so estinción. “Pel momento nun ta solucionáu tou, nin tanto, pero la situación ameyoró. Y ameyoró non solo de resultes del cambéu ambiental, sinón tamién de l’actuación que se siguió ayeri “, esplicó.

    Barbón, que confió en que se confirmen les bones temperatures y que podamos dir embridando la situación”, repitió’l so llamamientu a la collaboración ciudadana pa evitar los fueos intencionales, situación que tou paez indicar que ye la causa de la quema de Ibias. “Precisamos qu’ante’l mínimu indiciu o noticia de quién pudo tar detrás de cualquier quema provocada, por favor, que lo comuniquen a les autoridaes, precisamos actuar con contundencia”, aseguró. “La persona que provocara una quema poniendo en riesgo vides, tien que pagar por ello”, añedió.

    El presidente tamién apeló a la ciudadanía pa que collabore coles autoridaes nos desallugos preventivos derivaos de les quemes forestales, especialmente nel qu’afecta al conceyu d’Ibias, onde hubo que treslladar a 41 persones de seis pueblos. “Cuando se determina la necesidá d’un desallugu, faise pola seguridá de les persones. Ayeri hubo que sacar xente n’helicópteru porque la carretera yera yá intransitable”. Poro, pidió que se cumplan con estes indicaciones “porque se trata de protexer vides, tanto de quien viven nos pueblos como de quien trabayen nos operativos.

  • La voz de Palestina sonó nel Hípico de Xixón gracies al xestu d’un aficionáu

    La voz de Palestina sonó nel Hípico de Xixón gracies al xestu d’un aficionáu

    Na tarde d’ayeri, mientres se celebraba’l percorríu del xinete israelín Robin Muhr nel Concursu Hípico Internacional de Les Mestes, un home irrompió nes gradas con una bandera de Palestina y el clamu «Free Palestine». La so aCción, cargada de valentía y de compromisu, fixo visible una causa qu’ufierta dignidá y voz a un pueblu qu’está pidiendo reconocimientu y xusticia.

    L’aparición del manifestante, alredor de les 18.15 hores, sorprendió al públicu y a los participantes. Pa munchos, l’actu non yera un simple altercáu, sinón un xestu de coherencia ética: nun momentu d’allegría deportiva, recordóse que nel mundu hai pueblos que siguen lluchando pola so llibertá.

    Magar que parte del públicu amosó enfotu y se trató de quitar la bandera de les manes al home, la imaxe quedará como testimoniu d’una intervención pacífica, onde la palabra y el símbolu sirvieron pa dar voz a los que non la tienen.

    Hasta’l llugar allegó la Policía Local y la Nacional, anque nun hubo detenciones. El manifestante abandonó les gradas ensin más incidentes, pero dexó una estela de reflexón y de respeutu ente aquellos que vieron nel so xestu un exemplu d’honra y compromisu colos derechos humanos.

  • Izquierda Xunida y Podemos acusen al conceyal de Deportes nun querer sofitar económicamente la Copa de la Reina de h.oquei

    Izquierda Xunida y Podemos acusen al conceyal de Deportes nun querer sofitar económicamente la Copa de la Reina de h.oquei

    El voceru municipal d’Izquierda Xunida nel Conceyu de Xixón, Javier Suárez Llana, acusó al conceyal de Deportes de pretender “nun invertir nin un euru” na Copa de la Reina de h.oquei sobre patinos que se va celebrar “al so pesar” el próximu añu na ciudá. Suárez Llana fixo estes declaraciones en conociendo la propuesta d’ordenances del Patronatu Deportivu Municipal pa 2026, qu’inclúin xuna tarifa pal cobru d’entraes a los partíos de la competición.

    “El conceyal de Deportes pretende que la recaldación de taquilla vaiga al PDM de manera que recupere lo invertío. Esto ye, que’l sofitu económicu del Conceyu por que se celebre en Xixón la Copa de la Reina va ser cero. Pero quien asume siempres el mayor esfuerzu organizador nesti tipu de competiciones son el club anfitrión y la so masa social, nesti casu’l Telecable H.oquei Club”, esplica’l conceyal d’IX, que defende que “tendría de ser ehó, nel mesmu deporte base, onde impacte la torna económica de la inversión municipal”.

    Pa Suárez Llana, “Jorge Pañeda sigue poniendo palos nes ruedes; primero fixo tolo posible porque la Copa nun se celebrara en Xixón y agora pretende amenorgar a cero la inversión y nun sabemos ensin con ello estremar al club de la organización o cuantimenos enzancar la so participación”. El conceyal d’IX llamenta “el tratu que ta dando’l PP a los clubes deportivos de la ciudá y la nula complicidá del Gobiernu municipal col deporte femenín”. IX va presentar una enmienda a la ordenanza del Patronatu Deportivu Municipal pa desaniciar la tarifa venceyada a la Copa de la Reina y encamienta al conceyal de Deportes a sentase col Telecable a alcordar un marcu de collaboración pa la organización del eventu deportivu”.

    Pa Olaya Suárez, “llama l’atención que, dempués de tantu discutiniu y tantes vueltes, el
    conceyal Jorge Pañeda solo decidiera a entamar un eventu que tien un costu tan
    pequeñu cuando se-y echó enriba la presión social, y too por qu’a la fin en realidá la inversión real del Conceyu vaya a ser nula”. La vocera morada enfeó amás que dende l’equipu de gobiernu nun tean cuntando pa la organización del tornéu col Telecable H.oquei Club, “unu de los clubes deportivos más importantes de Xixón”, llamentando que “nun
    faen parte a la so masa social nin dexen que’l beneficiu d’un eventu como esti repercuta nel so deporte base”.

  • El crecimientu del númberu d’investigadores n’Asturies incentiva l’actividá económica y l’empléu

    El crecimientu del númberu d’investigadores n’Asturies incentiva l’actividá económica y l’empléu

    El conseyeru de Ciencia, Borja Sánchez, destacó que’l crecimmientu nel númberu del personal científicu n’Asturies ta teniendo un papel clave como tractor de la economía y l’empléu. Mientres la so intervención nel actu de divulgación científica Villaviciosa con Ciencia, Sánchez punxo en valor les meyores llograes gracies a les polítiques impulsaes pol Gobiernu del Principáu.

    Asturies consiguió cerca de 8,5 millones y 64 proyectos nel marcu del Plan Nacional d’Investigación. Amás, nos postreros cinco años, el programa rexonal Severo Ochoa dexó la contratación de más de 300 investigadores predoctorales, consolidando a Asturies como una de les comunidaes con mayor sofitu a la investigación en fase inicial.

    Sánchez señaló qu’estos resultaos son frutu d’una estratexa sostenida que fortaleció les ferramientes de sofitu a la I+D+i, alzando tantu la inversión como’l númberu de profesionales dedicaos a la investigación. Nesti sentíu, destacó’l creciente atractivu d’Asturies pa investigadores d’excelencia, como los del prestixosu programa Ramón y Cajal, del qu’una trentena incorporóse apocayá a la Universidá d’Uviéu y a centros d’investigación d’Asturies.

    L’impactu d’estes polítiques refléxase tamién nos indicadores rexonales: en 2023, Asturies foi la comunidá autónoma con mayor crecimientu nel númberu de trabayadores dedicaos a la investigación (un 30% más que l’añu anterior) y la segunda en medría del gastu n’I+D (un 28,1%).

    “La conocencia que tamos xenerando ye un motor fundamental pa la economía asturiana”, afirmó Sánchez. “Ta contribuyendo al empléu, al aumentu d’afiliaciones a la Seguridá Social y a unu amenorgamientu del paru que ta algamando mínimos hestóricos”. Según el conseyeru, la ciencia ta atrayendo nueves industries ya inversiones con un fuerte componente tecnolóxicu y dixital, interesaes en patentes, grupos d’investigación y capacidaes científiques locales.

  • Barbón va convocar a los gobiernos de Galicia, Cantabria y Castiella y Llión pa coordinar una respuesta “rápida y eficaz” a les quemes forestales

    Barbón va convocar a los gobiernos de Galicia, Cantabria y Castiella y Llión pa coordinar una respuesta “rápida y eficaz” a les quemes forestales

    El gobiernu d’Asturies va convocar a los Executivos de les comunidaes vecines –Galicia, Cantabria y Castiella y Llión- coles mires de reforzar la coordinación énte les quemes forestales. El gobiernu tamién va conceder 800.000 euros n’ayudes directes a los ganaderos pa compensa-yos pola perda de forraxe causaes polos fueos.

    Adrián Barbón evaluó la evolución de les quemes. Anque “entá nun pasemos páxina” y los llabores de control y estinción siguen, la situación ameyoró notablemente al respective de les xornaes anteriores. L’atención a los fueos protagonizó la xunta selmanal del Conseyu de Gobiernu, que yá anunció nueves midíes empobinaes tanto a la prevención como al sofitu a los sectores más afectaos.

    Les conclusiones del Conseyu de Gobiernu fueron presentaes pol mesmu presidente asturianu, acompañáu de los conseyeros de Xestión d’Emerxencies, Alejandro Calvo, y del titular de Mediu Rural, Marcelino Marcos. Dalgunos de los sos principales mensaxes fueron los siguientes:

    • Salvar pueblos, salvar vides. Fueron y siguen siendo los oxetivos prioritarios del Gobiernu d’Asturies percima de cualesquier otra considerancia, enfatizó Barbón. Tanto’l presidente como los dos conseyeros abondaron nel agradecimientu a les persones implicaes nes xeres d’estinción, que demostraron “un esfuerzu que superó la obligación llaboral”, según resaltó’l titular de Xestión d’Emerxencies. Barbón emponderó’l bon funcionamientu del sistema d’emerxencies.
    • 5.500 hectárees quemaes. Esti ye’l balance provisional de la superficie esfarrapada pol fueu, a la espera de que puedan apagase tolos focos y realizase’l cálculu definitivu.
    • Reconocencia como zona catastrófica. Toles árees castigaes pola folada de quemes d’agostu van poder xuntase a la declaración de zona catastrófica (la denominación alministrativa ye zona especialmente afectada por una emerxencia de protección civil) que va aprobar mañana’l Conseyu de Ministros. La tramitación va ser más cenciella y rápida que n’ocasiones anteriores, porque la iniciativa parte de l’Alministración estatal, según esplicó Alejandro Calvo. Esa reconocencia va dexar recibir compensaciones.
    • Más recursos por que los conceyos ameyoren la prevención. Asturies, destacó’l presidente, supo sacar llecciones de les quemes de 2023. Cuenta con más medios y más personal para combatir los fueos y supo poner l’acentu na prevención cola creación d’un fondu específicu para los conceyos. Con cargu al mesmu, ta previstu la repartida de 18 millones ente 74 conceyos hasta 2026. Barbón anunció qu’esta cantidá va amontar colos presupuestos de 2026. Al tiempu, sorrayó la importancia de les midíes que facilita esti preséu, “como los nueve cortafueos executaos en Degaña”.
    • Coordinación coles comunidaes vecines pa encarar una situación distinta. El despoblamientu –col consecuente abandonu de los montes- y el calentamientu favorecen y agraven les quemes. El presidente sorrayó les dimensiones alcanzaes polos fueos, que pasaron d’una a otra comunidá, como asocedió nos Picos d’Europa y el suroccidente. Pa encarar esta situación distinta, el gobiernu va convidar a los gobiernos de les comunidaes vecines a reforzar la coordinación.
    • Un congresu p’aprender de la esperiencia internacional. Otros países yá tienen esperiencia nel abordaxe d’estes quemes, que los espertos denominen de sesta xeneración. Pa sacar llecciones, el Gobiernu d’Asturies va convocar una cume internacional, “un espaciu de reflexón” que dexe ameyorar la llucha contra’l fueu, informó’l presidente.
    • Sofitu a la ganadería: ayudes directes y PAC. Los fueos afectaron a los pacionales de la ganadería. Marcelino Marcos, qu’estimó “la solidaridá de los ganaderos”, anunció la distribución de 800.000 euros n’ayudes directes polos daños nel forraxe sufríos en nueve conceyos: Cabrales, Cangas, Casu, Degaña, Onís, Ponga, Quirós, Somiedu, Villayón. Estos fondos van conceder en función del númberu d’unidaes de ganáu mayor (UGM) y conforme a una gradación según el tipu d’animales. Coles mesmes, Marcos unvió un mensaxe de tranquilidá al sector: les quemes nun van afectar al cobru de les ayudes de la PAC.
    • A disposición de los conceyos. Barbón fixo fincapié na importancia de la coordinación ente Alministraciones. A esti respectu, ufiertó “collaboración máxima a los conceyos” por que puedan preparar los sos planes de prevención nos casos nos que tean obligaos a ello.
  • Asturies crea la marca Artesanía d’Asturies pa dar visibilidá a los productos y fortalecer el sector, pero ensin l’asturianu

    Asturies crea la marca Artesanía d’Asturies pa dar visibilidá a los productos y fortalecer el sector, pero ensin l’asturianu

    El gobiernu d’Asturies creó’l distintivu Artesanía d’Asturies, una marca institucional que tien como oxetivu dotar d’imaxe propia, única y reconocible a los productos realizaos polos artesanos de la comunidá. La Dirección Xeneral d’Empresa y Comerciu aprobó la regulación d’esti sellu, qu’empezó a recibir solicitúes d’usu per parte d’empreses, talleres y profesionales del sector, inscritos nel Rexistru d’Actividaes Artesanes.

    Con esta iniciativa pretende dase visibilidá, protexer y caltener el prestíu de los artesanos asturianos y de les sos obres, teniendo en cuenta la variedá d’oficios y, por tanto, de los productos d’esti tipu esistentes n’Asturies. Sicasí, la presencia del asturianu ye inesistente y nel manual de marca nun apaez. Mesma situación pal eonaviego, que nun apaez per nenguna parte, magar que dambos idiomes formen parte esencial de la cultura d’Asturies y de la so artesanía.

    El desenvolvimientu de la marca impúlsase tres l’alquisición, el pasáu mes de xineru, de la propiedá del distintivu Artesanía d’Asturies per parte del gobiernu. El nuevu sellu ta formáu por un isotipu inspiráu nun trisquel celta, símbolu d’identidá asturiana, y formáu por dos lletres A n’azul y mariellu acompañaes del logotipu Artesanía d’Asturies.

    Esta acreditación institucional busca destacar y roblar productos fechos n’Asturies; destacar la so procedencia; favorecer el so espardimientu y comercialización frente a los consumidores; protexer el prestíu de los talleres y artesanos asturianos, mesmo que de les sos creaciones, ya informar claramente sobre la naturaleza artesanal de los productos a los consumidores que los merquen.

    El decretu que regula esti distintivu, publicáu pola Conseyería de Ciencia, Industria y Comerciu nel Boletín del Principáu (BOPA), establez el so usu pa empreses y talleres artesanos inscritos nel Rexistru d’Artesanía del Principáu d’Asturies, asina como asociaciones profesionales del sector, puramente n’actividaes de promoción o comercialización de productos realizaos por asociaos que tean daos d’alta nel mentáu rexistru.

    La Dirección Xeneral de Comerciu yá empezó a tramitar les primeres solicitúes, que tienen de presentase al traviés de la see electrónica del Principáu d’Asturies. El procedimientu va caltenese abiertu de manera permanente y el plazu pa conceder autorización pal usu del distintivu ye d’un máximu de trés meses.