Un 24 d’agostu de 1937 Xixón convertíase na capital d’una Asturies independiente. Facía tiempu que los territorios d’Asturies y Llión taben xeográficamente dixebraos del restu de territoriu embaxo control del gobiernu lexítimu republicanu. Les tropes fascistes del xeneral Franco ocupaben tola zona central peninsular faciendo bien difíciles les comunicaciones ente los dos territorios que defendíen la llegalidá democrática asaltada.
El presidente del Conseyu Rexonal d’Asturies y Llión, presidíu pol sindicalista y diputáu socialista Belarmino Tomás resistía dende Xixón y llevaba tiempu actuando de forma autónoma, con non pocos conflictos col gobiernu central, que taba centráu na defensa del frente mediterráneu dexando nun ciertu abandonu a Asturies y el restu de territorios del norte peninsular.
En xunu de 1936 cai Bilbao y Asturies queda sola dafechu, col occidente y Uviéu tomaes tamién poles tropes franquistes.
El decretu aprobáu aquel 24 d’agostu funda’l Conseyu Soberanu d’Asturies y Llión cola «plena responsabilidá del mandu soberanu nel territoriu de la so autoridá», dicía’l solemne decretu. El Gobiernu del presidente Belarmino Tomás, con socialistes, comunistes y anarquistes, asume toles competencies y el control sobre l’actividá civil y militar. El Conseyu emite la so modena propia, que se conoz como «belarminos» y Xixón conviértese na capital dende’l día de la entrada en vigor de la independencia, 25 d’agostu.
El gobiernu va instalase na Casa Blanca, l’edificiu racionalista asitiáu na Plaza’l Parchín de Xixón. Los conseyos de gobiernu celebrábense nel agora Vieyu Institutu Xovellanos.
Popularmente conozse entós al Conseyu como «el gobiernín», términu qu’usen con despreciu los miembros del Gobiernu de la España republicana y el presidente de la República Manuel Azaña.
L’hestoriador hispanista Hugh Thomas denominó a aquel gobiernu la República d’Asturies, anque Belarmino Tomás esplicaba qu’aquella independencia nun buscaba «separatismu» sinón necesidá de xestionar el territoriu en tan complicaes circunstancies, frente a les crítiques de desllealtá y d’insurrección espedíes pola República española. Belarmino Tomás yera pa dalgunos sospechosu, pues participara como unu de los cabezaleros na Revolución d’Asturies de 1934, onde tamién esistió un esperimientu soberanista asemeyáu sobre los territorio dominaos polos revolucionarios.
Daquella Belarmino Tomás fuera condergáu a pena de muerte, conmutada por pena de cárcel un añu dempués y a la fin lliberáu dempués de la victoria del Frente Popular nel 36.
La independencia fecha por non independentistes duró hasta’l 20 d’ochobre, cuando los miembros del Gobiernu d’Asturies celebraron el conseyu de gobiernu caberu, saliendo en barcu dende’l puertu d’El Musel un día dempués, entamando una dura represión contra los que nun fueren quien a fuxir de Xixón.
Nun informe posterior, Belarmino Tomás echaba en cara al gobiernu d’España les acusaciones que contra ellos fixeren: “Sospechar que naquellos momentos, marxistes, llibertarios y republicanos, declaraben una soberanía con fines separatistes más que de ser fatos ye tener maldá”.
57 díes duró la esperiencia independentista « por necesidá», que reproducía de dalguna manera a la proclamación de soberanía de la Xunta Xeneral d’Asturies frente a la invasión francesa del 25 de mayu de 1808.
El despachu de Belarmino Tomás foi incantáu y dende va unos años volvió a ponese en valor tanto la so figura como los muebles del so despachu. El presidente Adrián Barbón dedicó-y una estancia nel Palaciu de los Presidentes, llar de la presidencia del Gobiernu d’Asturies n’Uviéu, onde agora firma dellos de los decretos de más importancia o celebra actos como l’homenaxe a los fundadores de Conceyu Bable, como xestu simbólicu de reconocencia a la tradición presidencial asturiana.
