Xixón al día

Autor: xixonaldia

  • Xixón concentróse na Plaza del Marqués contra’l racismu y en sofitu al pueblu palestín

    Xixón concentróse na Plaza del Marqués contra’l racismu y en sofitu al pueblu palestín

    Ayeri pela tarde, la Plaza del Marqués en Xixón convirtióse n’escenariu d’una masiva concentración ciudadana na que centenares de persones alzaron la so voz contra’l racismu y pa denunciar con firmeza’l xenocidiu que ta sufriendo el pueblu palestín.

    La movilización, convocada por coleutivos y organizaciones antirracistes, quiso visibilizar «la complicidá internacional frente a la barbarie» y reclamar una respuesta contundente por parte de les instituciones asturianes y estatales.

    Los asistentes portaben pancartes con llemas como «La humanidad está de luto», «Paremos el racismo», y «Asturies con Palestina». L’actu, pacíficu y cargáu d’emoción, incluyó llectures de manifiestos y actuaciones musicales cola Charanga «El Ventolín»

    Dende la organización, faise un llamamientu a nun quedar en silenciu frente a la inxusticia,

    La concentración remató con un fuerte aplausu y la promesa de siguir na cai defendiendo la dignidá y los derechos humanos en tol mundu.

  • El pabellón d’Asturies na 68ª edición de la FIDMA va tar dedicáu a la cultura sidrera asturiana

    El pabellón d’Asturies na 68ª edición de la FIDMA va tar dedicáu a la cultura sidrera asturiana

    El pabellón d’Asturies na 68ª edición de la Feria Internacional de Muestres d’Asturies (Fidma) va tar dedicáu a la cultura sidrera asturiana, declarada patrimoniu mundial inmaterial pola Unesco’l pasáu avientu. L’estand institucional acueye una gran esposición sol lema Asturies ye sidrera. Lo nueso ye mundial y va ufiertar tamién actividaes en vivu, xuegos, talleres y recreaciones históriques.

    La viceconseyera de Turismu, Lara Martínez, presentó güei’l conteníu del espositor, nel que destaca l’amuesa comisariada por Luis Benito García, director de la Cátedra Sidra d’Asturies DOP. La esposición plantega una inmersión na hestoria y la cultura de la sidra asturiano, un gran curiosu atractivu de la comunidá, pero tamién reflexu d’una industria sostenible que supo xunir tradición ya innovación pa crear un entramáu gastronómicu basáu na máxima calidá del productu. El pabellón institucional conviértese asina nun homenaxe vivu a una forma d’entender la vida, de compartir y de celebrar.

    El percorríu empieza na zona esterior del pabellón, onde se reproduz una vivienda tradicional con horru y llagar, y sigue na planta baxa, onde s’esplica la dimensión del sector sidreru y la importancia de la reconocencia de la Unesco pa- la comunidá, al traviés de conteníos etnográficos, audiovisuales, grafismos, maquetes, realidá aumentada, esperiencies sensoriales, degustaciones, xuegos interactivos y actividaes pa tolos públicos.

    Dende que se paña la mazana hasta’l corcháu, pasando pol mayáu y la ellaboración artesanal, tol ciclu de la sidra reproduzse na primer planta del pabellón al traviés d’una esposición qu’apuesta polo sensorial, lo lúdico y lo participativo. El visitante va poder entrar nuna pumarada, conocer de cerca los proyectos d’investigación del Serida y vivir una esperiencia inmersiva en 3D sobre’l procesu de mayáu de la mazana. Tamién va poder sumase a la creación d’una gran obra colectiva titulada La sidra compártese, vívese y recuérdase. Gracies por formar parte d’esta collecha.

    El procesu d’ellaboración de la sidra, el de corcháu y los xuegos y costumes amestaos a la cultura sidrera tamién tienen el so espaciu na primer planta, na que’l ciclu de la sidra amuésase al traviés d’un videoxuegu. Amás, ufiértense pa tastiar dalgunos de productos con denominación o indicación xeográfica protexida.

    Pa rematar la visita na planta baxa, el públicu va atopar un chigre tienda y una espicha y va poder poner a prueba, tanto tradicionalmente como virtualmente, la técnica del escanciáu.

  • Oriol Roch Izard, xerente nuevu de la OSPA

    Oriol Roch Izard, xerente nuevu de la OSPA

    El conseyu rector de la Orquesta Sinfónica del Principáu d’Asturies (OSPA) dio’l vistu bonu al informe de la comisión de valoración del procesu selectivu pa la xerencia de la orquesta, nel que se propón a Oriol Roch Izard pa liderar la sinfónica. La conseyera de Cultura, Política Llingüística y Deporte, Vanessa Gutiérrez, presidió esta mañana una xunta pa resolver el procesu. El nomamientu va ser efectivu tres l’aprobación del correspondiente decretu per parte del Conseyu de Gobiernu.

    Roch Izard llogró la mayor puntuación global nun procesu d’evaluación rigorosu y tresparente, nel que se valoraron los méritos, el proyectu estratéxicu y de xestión, asina como les competencies profesionales de les persones aspirantes. En total, recibiéronse 15 candidatures, toes elles de gran calidá.

    El candidatu propuestu cuenta con una sólida trayectoria nel ámbitu de la xestión cultural y musical. Dende 2014 foi director xeneral de la Euskadiko Orkestra y enantes ocupó cargos como director técnicu de la Real Filharmonía de Galicia (2004-2014), xerente de la Orquestra de Cambra Teatre Lliure (1990-2002) y responsable de proyectos culturales nel Ayuntamientu de Mataró. Ye llicenciáu n’Hestoria Contemporanea y tien un posgrau en Xestión Empresarial. Amás de castellán, fala inglés, francés y catalán.

    La conseyera de Cultura estimó’l trabayu de la comisión de valoración, compuesta por representantes del conseyu rector y profesionales de reconocíu prestíu nel ámbitu musical y de la xestión cultural.Coles mesmes, Gutiérrez punxo en valor l’esfuerzu y compromisu de tol equipu técnicu y artísticu de la OSPA, especialmente mientres los últimos meses, nos que l’actividá de la orquesta siguió con intensidá y escelencia.

  • Movilidá va reforzar el serviciu d’autobuses ente Uviéu y Xixón les fines de selmana d’agostu

    Movilidá va reforzar el serviciu d’autobuses ente Uviéu y Xixón les fines de selmana d’agostu

    El Gobiernu d’Asturies va reforzar la so ufierta de tresporte públicu ente Uviéu y Xixón toles fines de selmana d’agostu. L’oxetivu ye ameyorar la calidá d’un serviciu, emprestáu pol Consorciu de Tresportes d’Asturies (CTA), que rexistra una intensa demanda dende l’entamu de la temporada braniega.

    Asina, los sábados y domingos del próximu mes, la operativa d’autobuses ente los dos principales ciudaes asturianes va ser la mesma que nos díes llaborables, con 62 frecuencies diaries d’ida y vuelta, que suman 124 servicios. Davezu, les fines de selmana ufiértense 48 frecuencies diaries.

    Tamién se va aumentar la ufierta de búhos, de manera qu’ente les 3:00 y les 6:20 hores de la madrugada habrá salíes cada 20 minutos. Esto supón pasar de 16 a 19 frecuencies d’ida y vuelta a lo llargo de la nueche, que suman un total de 38 servicios.

    Los refuerzos de la operativa de tresporte públicu ente Uviéu y Xixón inscríbense dientro del firme apueste del Gobiernu d’Asturies pa fomentar la movilidá sostenible y facilitar l’accesu al tresporte públicu gracies a la tarxeta CONECTA.

    Estes meyores na movilidá metropolitana súmense a les que CTA punxo en marcha a principios de xunetu en Xixón, cola ampliación d’horarios nes rutes con Uviéu y Avilés hasta la 01:00 y les 00:30 hores, respectivamente. Esta operativa va tar vixente a hasta’l 8 de setiembre, coincidiendo cola temporada de mayor arribación turística. Nesti periodu tamién s’aumentó la conectividá con Mieres del Camín, que caltien les cuatro frecuencies diaries con Xixón qu’operen mientres el cursu universitariu.

  • Enorme enfadu vecinal en Vega poles torgues del Conceyu pa la celebración de les sos fiestes

    Enorme enfadu vecinal en Vega poles torgues del Conceyu pa la celebración de les sos fiestes

    Indignación de los vecinos y vecines y de los miembros de la Comisión de Fiestes de Vega poles dificultaes y torgues que la entidá organizadora ta atopando per parte del ayuntamientu pa la celebración de les fiestes n’honor a San Bartolomé de Vega que se celebraríen del 22 al 24 d’agostu na parroquia xixoniega.

    La Comisión de Fiestes, col sofitu de la AVV San Emiliano de Vega, manifestó’l so malestar polos entueyos que ta imponiendo la municipalidá de cara a la romería. Dambes entidaes señalaron al traviés d’un escritu qu’estes fiestes parroquiales son yá una tradición centenaria, con datos relativos a la so celebración nel sieglu XIX, realizándose a lo llargo d’esti tiempu, na carbayera amiesta a la ilesia de San Emiliano de Vega. El serviciu de Parques y Xardinos municipal quería refugar el permisu pa les fiestes d’esti añu alegando protección pa les especies arbórees; cuando esi espaciu ye propiedá privada -del Arzobispáu d’Uviéu- asumiendo la parroquia colos sos fondos de la siega y caltenimientu de dichu espaciu, cuntando en determinaos momentos cola ayuda de la Comisión de Fiestes y de l’Asociación de Vecinos polos altos costos d’estes intervenciones. Énte l’altu preciu de les intervenciones, solicitóse collaboración de la municipalidá, llogrando namás el non por respuesta amás de recibir un tratu bien desagradable per parte del serviciu de Parques y Xardinos amenaciando con denuncies y criticando a l’autoridá eclesial.

    Otru problema bien grave que se produció apocayá son les llimitaciones nel horariu de zarru de los díes de les fiestes. A menos d’un mes del entamu de les mesmes, cuando’l programa yá ta zarráu treslládense estos cambeos provocando un perxuiciu enorme a la comisión organizadora y al trabáu desenvueltu por toles persones que collaboren na so celebración.

    Dende la Comisión de Fiestes de Vega recuerda que la fiesta de Vega ye una romería tradicional en que collabora tol pueblu, dende los pequeños hasta los vieyos, y pide al Ayuntamientu que compruebe in situ esta realidá. Amás, la Fiesta de la lluz con bengales y fueos artificiales que zarra los festexos ye una tradición que se lleva faciendo 29 años.

    Los colectivos solicitaron una xunta urxente col conceyal de Festexos, Oliver Suárez, pa tratar de llograr una solución a la nueva considerancia de los horarios y reclamaron ‘sentíu común’ a l’alministración local.

  • Ñaz en Castropol el festival El Pueblo

    Ñaz en Castropol el festival El Pueblo

    Nel branu de 2025 ñaz “El Pueblo”, un eventu gratuitu, pa tolos públicos y con calter itinerante, que ñaz coles mires de rindir homenaxe a los pueblos que conformen la identidá d’Asturies y da-yos el protagonismu que merecen. Esta iniciativa busca non solo fortalecer l’arguyu de pertenencia rural, sinón tamién xenerar un impactu positivu na imaxe y la economía local de cada llugar onde se celebre.

    La primer edición va tener llugar los díes 13 y 14 de setiembre en Castropol, una de les xoyes del occidente asturianu, asitiáu en plena Reserva de la Biosfera del Eo. Mientres tola fin de selmana, el conceyu va tresformase nun espaciu d’alcuentru, cultura, música y tradición.

    Un programa pa tola familia

    El Pueblo va ufiertar una variada programación d’actividaes pensaes pa tolos públicos:

    • Conciertos de primer nivel, con artistes como Sidonie, cabeza de cartelu, al pie de Marlena, King África, The Rapants, Sangrixueles del Guadiana, Neños Bravos, Amor Líquido, The Goodmen, Alfredo García, La Banda de Gaites El Penedón, y una potente sesión electrónica con Héctor Llamazares, Yahaira, Kresy y Alejandro Ávila.
    • Actividaes tradicionales y locales, como les emblemátiques alfombres florales de Castropol, rutes guiaes, paseos a caballu, esposiciones de semeyes históriques y una zalea por embarcaciones del Club de Vela de Castropol.
    • Mercáu de productos asturianos y Alimentos del Paraísu, colo meyor de la nuesa gastronomía y artesanía.
    • Yoga con Betty Ewan, pa esfrutar d’un momentu de relax nuna redolada privilexada.
    • Espacios y talleres infantiles: pintacares, globoflexia y munches sorpreses más pa la reciella.

    “El Pueblo” ñaz con una clara vocación social y cultural: demostrar que los nuesos pueblos nun son namás llugares guapos pa visitar, sinón tamién espacios ideales pa vivir, entamar y construyir comunidá. Esta primer edición, que se va celebrar en Castropol, marca l’entamu d’un proyectu itinerante que va percorrer distintes localidaes asturianes en futures ediciones.

  • Asturies llora la perda de Xuan Bello

    Asturies llora la perda de Xuan Bello

    Asturies llora la perda de Xuan Bello. Ayeri, a última hora, saltaba la noticia de la muerte repentina d’unu de los escritores asturianos más relevantes de los últimos tiempos. Bello taba siendo atendíu nel Hospital Universitariu Central d’Asturies (HUCA), n’Uviéu, al que se treslladó dempués de sentise indispuestu. Los mensaxes de condolencies nun se fixeron esperar y decenes d’artistes ya instituciones llamenten esta perda tan grande pa la lliteratura asturiana.

    «Lamentamos fondeiramente la muerte de Xuan Bello, gran escritor y defensor de la llingua asturllionesa. La sou voz y obra quedarán pa siempre ente nós. A la sou familia y allegados, todu’l nuesu calor. Descansa en paz», publicaba en redes sociales l’Institutu Llionés de Cultura.

    Pela so parte, l’Academia de la Llingua Asturiana, de la que formaba parte como académicu correspondiente, llamentaben «fondamente la muerte de Xuan Bello, Académicu Correspondiente de l’ALLA dende mui mozu y primer Premiu Nacional de Lliteratura Asturiana. La institución quier acompañar a la so familia y xente cercano nestos momentos murnios de perda. La importancia y trescendencia de la figura y obra de Xuan Bello pa les lletres asturianes y, poro, p’Asturies y pal so idioma, desmepeñó un papel fundamental.
    Foi ún de los escritores más mozos que dieron los años ochenta n’Asturies y participó dende la so escritura lliteraria y periodística nos movimientos de recuperación, dignificación y universalización de la llingua de nueso», nun comunicáu que repasa una trayectoria enllena d’esitos lliterarios.

    Asociaciones de la reivindicación llingüística, como Iniciativa pol Asturianu, amosó tamién «la so pena pol fallecimientu del escritor Xuan Bello, una de las voces más significativas de la lliteratura asturiana contemporánea. La perda del autor, reconocíu nel añu 2017 col Premiu Nacional de Lliteratura que conocede l’Academia de la Llingua Asturiana, xenera un vacíu irremplazable en el ámbitu cultural y lliterariu asturianu». De la mesma manera, la propia asociación anunció que va «entamar un actu d’homenaxe dientro del IV Día de la Llingua Asturiana na Feria de Muestres d’Asturies que se va celebrar el sábadu 16 d’agostu. L’asociación va proponer una llectura a micrófonu abiertu de la obra ‘Hestoria Universal de Paniceiros’ pa espardir la so obra cimera faciendo partícipe a tola sociedá.»

    Dende l’equipu de gobiernu asturianu, el propiu presidente Adrián Barbón o la conseyera de Cultura, Vanessa Gutiérrez, amosaron la so tristura énte esta muerte prematura del escritor ya intelectual de Tinéu. «Ablucáu entá pola muerte de Xuan Bello namás tengo la fuercia pa escribir unes pallabres que nun son consuelu, sinón llantu. Asturies pierde a un de los dos meyores fios, amante de les sos llingües, cultura y tradiciones. Escritor esceicional y persona estraordinaria.», tuiteaba el xefe del executivu. Tamién el conceyu natal del escritor, Tinéu, llamentó la perda, declarando llutu oficial.

  • El Muséu Xurásicu d’Asturies modernízase con una inversión de 600.000€

    El Muséu Xurásicu d’Asturies modernízase con una inversión de 600.000€

    El Muséu del Xurásicu d’Asturies (MUJA), unu de los grandes emblemes del turismu familiar na comunidá, avanza na so modernización con una inversión global de 600.000 euros destinada a incorporar conteníos dixitales y interactivos que tresformen la esperiencia del públicu.

    Esta renovación refuerza’l papel del MUJA como motor cultural, científicu y turísticu. La vicepresidenta y presidenta en funciones, del Gobiernu d’Asturies, Gimena Llamedo, visitó güei l’equipamientu pa conocer de primer mano les nueves instalaciones y recursos tecnolóxicos, diseñaos ya impulsaos pola Sociedá Pública de Xestión y Promoción Turística y Cultural del Principáu. “El MUJA ye un referente internacional del patrimoniu xeolóxicu. Con esta inversión, damos un pasu más para convertilo nun muséu del sieglu XXI: un espaciu qu’anueva pa emocionar, enseñar y conectar con tola familia”, sorrayó Llamedo.

    Ente les principales novedaes destaquen les siguientes:

    • Trés nueves pantalles de gran formatu na Sala del Xurásicu Asturianu que proyecten recreaciones animaes del paisaxe y la biodiversidá de cada periodu xeolóxicu, venceyaes a los fósiles esibíos.
    • Na Sala d’Introducción al Xurásicu, el visitante puede ver cómo s’allumen ciertos güesos del ictiosauriu más completu topáu na península Ibérica, que se resalten simultáneamente nuna proyección mural pa reconstruyir la cadarma completa. Al traviés d’una recreación animada, tamién s’amuesa’l fondu marín nel qu’habitaba esti reptil xurásicu y cómo se movía.
    • Un nuevu vídeu animáu esplica cómo una pisada de dinosauriu se convirtió en fósil, acompañáu por una lluz dixital que marca caúna de les icnites esibíes.
    • Sustitución de reproductores antiguos por sistemes dixitales. Amás, ente otres iniciatives trabáyase na instalación de rede wifi nel interior y esterior del muséu, asina como nel refuerzu del sistema de megafonía esterior pa fortalecer la comunicación y la seguridá.
  • La Federación de Patinaxe contradiz la versión del equipu de gobiernu de Moriyón pola renuncia a la Copa de la Reina

    La Federación de Patinaxe contradiz la versión del equipu de gobiernu de Moriyón pola renuncia a la Copa de la Reina

    La Federación Española de Patinaxe salió nes últimes hores de la tarde d’ayeri en defensa propia tres les declaraciones de Jorge Pañeda, conceyal de Deportes y Educación, nel que xustificaba la renuncia a la organización de la Copa de la Reina pa la edición del añu 2026. La Federación denuncia la falta total de comunicación” del edil dende mayu y niega rotundamente que s’endurecieren les condiciones p’allugar el tornéu. Coles mesmes, describe que delles de les sos afirmaciones «falten de forma mui grave a la verdá de los fechos».

    La defensa de la propia federación argumenta que l’Ayuntamientu nun contactó con ellos dende’l mes de mayu. Según la Federación, l’últimu intentu d’establecer contactu tuvo llugar el 17 de mayu, cuando’l director xeneral, Xavier Moyano, unvió un mensaxe a Jorge Pañeda al traviés de WhatsApp, coles mires d’alcordar una xunta p’avanzar na organización del eventu. El conceyal respondió indicando que s’atopaba fuera del país y propunxo volver a entamar el diálogu ente’l 26 y el 30 de mayu. “De magar, efectuáronse numberoses llamaes ensin llograr respuesta dalguna. Nun esistió nengún tipu de comunicación posterior per parte del Conceyu nin de los sos representantes”, destaca la RFEP.

    L’organismu tamién recuerda que la Copa de la Reina 2025 terminó celebrándose en Cerdanyola, el pasáu mes de xunu, “precisamente por cuenta de la incertidume sobre la so realización en Xixón, tal como se prometiera primeramente dende la conceyalía, que nun comunicó la so negativa definitiva hasta últimu momentu”. Según la RFEP, el Conceyu yera “dafechu consciente” de les feches propuestes pal eventu.

    En cuanto al antecedente de 2025, la Federación espón la so propia versión de los fechos. “A empiezos d’anguaño, el Sr. Pañeda manifestó’l so interés n’acoyer la edición de 2025, coincidiendo col 30º aniversariu del Telecable HC. Sicasí, más p’alantre informó verbalmente de que nun podríen asumir el compromisu por motivos presupuestarios, plantegando retardar la celebración a 2026”. Dende esi momentu, aseguren, “tou intentu de reactivar el diálogu per parte de la RFEP foi en devanéu”.

    Nun se trata, apunten, d’un casu aislláu. La RFEP sorraya qu’este mesmu patrón “repitióse n’ocasiones anteriores con otres competiciones, como la Copa Intercontinental, que finalmente tuvo llugar en San Juan (Arxentina) énte la falta de meyores per parte de Xixón”.

  • El PSOE reclama una política de movilidá integral

    El PSOE reclama una política de movilidá integral que dea respuesta a les necesidaes de les vecines y vecinos de Xixón, una política que planie qué y cómo van convivir nel nuesu conceyu vehículos, residentes, y visitantes. Frente a esto, el gobiernu local actúa con improvisación y, pa los socialistes, la consulta pública sobre l’ampliación de la O.R.A ye bona prueba d’ello. “¿Cuál ye l’oxetivu de la consulta popular? ¿En qué barrios o zones va ampliase? ¿En qué va beneficiar a los y les xixoneses? ¿Va ameyorar el problema d’aparcamientu que s’atopen munchos vecinos y vecines que ven allargada la so xornada llaboral hasta una hora porque tán buscando aparcamientu? Eses son les entrugues a les que tendría de dar respuesta Foro y el so conceyal de Tráficu”, esplicó Tino Vaquero.

    El conceyal del Grupu Municipal Socialista acusó al gobiernu d’intentar tapar la so inacción con esta consulta popular y sentencia: “Pa Pelayo Barcia la meyor política de movilidá ye la que nun esiste y por eso’l tráficu en Xixón circula baxo la llei de la xungla. Énte los problemes de circulación y aparcamientos que se tán viendo potenciaos esti branu, fai falta planificación y regulación, tolo demás son improvisaciones”.

    El descontrol descritu en materia de tráficu viose reflexáu en Porceyo, un caos que los socialistes denunciaron la selmana pasada y que ye consecuencia de la falta de previsión y coordinación énte l’arribación masiva de persones pola ampliación de la superficie comercial nel polígonu. Por esti motivu, el PSOE axuntó cola presidenta de l’asociación vecinal de Porceyo, que treslladó la so esmolición pola movilidá na redolada. “Aumentó’l fluxu de persones a la zona ensin que’l Conceyu propunxera alternatives o coordináu con otres alministraciones cómo amenorgar esi impactu. Los vecinos dícennos qu’entrar o salir de Porceyo convirtióse nuna odisea diaria y el gobiernu local tien la obligación de movilizar recursos y faer un analís de la situación”, añede Vaquero de la que conclúi que “empezamos a vivir les consecuencies d’un modelu urbanu ensin visión de futuru y ensin diálogu colos barrios”.